Tuberkulyoz dunyodagi eng ko‘p o‘lim keltiruvchi infeksiya deb topildi

Jahon sog‘liqni saqlash tashkiloti hisobotida aytilishicha, tuberkulyoz (sil kasalligi) — sayyoradagi eng ko‘p ajal keltiruvchi kasallik, deb yozadi “RIA Novosti”.

Ta’kidlanishicha, global harakatlar natijasida 2000-yildan buyon 54 million kishi tuberkulyoz tufayli o‘limdan saqlab qolingan, ammo 2017-yilning o‘zida undan 1,6 million kishi vafot etgan.

“Sayyorada 2017-yilda 10 millionga yaqin kishi tuberkulyoz bilan kasallangan. Yangi bunday holatlar har yili 2 foizga qisqarib bormoqda”, — deyiladi tashkilot xabarida.

Jahon sog‘liqni saqlash tashkiloti hisob-kitoblariga ko‘ra, 2018-yilda past va o‘rta daromadli mamlakatlarda tuberkulyozning oldini olish va davolash uchun 3,5 milliard dollar mablag‘ yetishmaydi. Agar choralar ko‘rilmasa, summa 2022-yilgacha qariyb ikki barobar o‘sishi mumkin. Muammo yana shundan iboratki, tobora ko‘proq odamlar tuberkulyozning rezistent shakliga chalinmoqda — kasallik eng samarali dori bo‘lgan rifampitsinga reaksiya ko‘rsatmaydi.

Tashkilot keltirgan ma’lumotga ko‘ra, har to‘rtinchi kishi tuberkulyoz infeksiyasi tarqatuvchisidir.