Toshkentdagi avtobus saroylaridan biri Singapurning yetakchi kompaniyasiga berilishi mumkin. Bu haqda “Toshshahartransxizmat” AJ rahbariyati va OAV vakillari ishtirokida o‘tkazilgan matbuot anjumanida to‘xtalib o‘tildi, deb xabar beradi “Xalq so‘zi”.
Kompaniya xabariga ko‘ra, ayni paytda Singapurning yetakchi kompaniyalari bilan o‘tkazilayotgan muzokaralarda avtobus saroylaridan birining boshqaruvini ularga berish masalasi har taraflama o‘rganilmoqda.
Bundan tashqari, avtosaroylarda MAN rusumli avtobuslar sonining ortib borayotganini hisobga olib, 5-avtobus saroyi qoshida MAN servis markazini qurish bo‘yicha ishlar boshlanmoqda.
Tadbirda xizmat sifatini yaxshilash borasida olib borilayotgan keng qamrovli sa’y-harakatlarga qaramasdan ko‘rsatilayotgan xizmatlardan norozi bo‘lib, jamiyatning ishonch telefoni orqali murojaat qilayotganlar hamon uchrayotgani, ularning asosiy qismi haydovchi va chiptachilarning qo‘pol muomalasi, yo‘lovchilarga chipta bermaslik, qatnovlar doimiyligi va oraliq intervallarini buzish, bekatlarda to‘xtamaslik yoki uzoq turib qolish, yo‘nalishni o‘zgartirish kabi masalalari ekanligi qayd etildi.
Izoh (0)