O‘zbekiston Respublikasi Oliy Majlisi Senati Raisining birinchi o‘rinbosari Sodiq Safoyev boshchiligidagi O‘zbekiston delegatsiyasining Yaponiyaga tashrifi doirasida Yaponiya parlamentida ikki tomonlama o‘zbek-yapon munosabatlariga doir tadbirlar bo‘lib o‘tdi. Bu haqda O‘zA xabar berdi.
“O‘zbekiston Respublikasi Oliy Majlisi — Yaponiya parlamenti” parlamentlararo forumining navbatdagi majlisi va “Harakatlar strategiyasining beshta ustuvor yo‘nalishi bo‘yicha demokratik islohotlar va yangilanishlar yo‘li. O‘zbekistonning Yaponiya bilan hamkorlik istiqbollari” nomli o‘zbek-yapon simpoziumi O‘zbekistonning Yaponiyadagi elchixonasi va O‘zbekiston Oliy Majlisi Senati tashabbusi bilan Yaponiya parlamentining O‘zbekiston bilan do‘stlik ligasi ko‘magida tashkil etildi.
Mazkur tadbirlar Yaponiyada katta qiziqish uyg‘otdi. Unda Yaponiyaning rasmiy, ishbilarmonlik va tadqiqot doiralari, oliy o‘quv yurtlari, ommaviy axborot vositalari vakillari ishtirok etdi.
Parlamentlararo forumda ikki mamlakat qonun chiqaruvchi organlari o‘rtasidagi hamkorlikning bugungi holati va istiqbollari yuzasidan batafsil fikr almashildi. Aloqalarni yanada kengaytirish, Yaponiya parlamentining do‘stlik ligasi va O‘zbekiston Respublikasi Oliy Majlisidagi Yaponiya bilan hamkorlik bo‘yicha guruh o‘rtasidagi o‘zaro hamkorlikni kuchaytirish, 2019-yilda O‘zbekistonda Parlamentlararo forumning navbatdagi majlisini tashkil etish masalalari muhokama etildi.
Simpozium ishtirokchilari Prezident Shavkat Mirziyoyev rahbarligida O‘zbekistonda amalga oshirilayotgan keng ko‘lamli islohotlar, Harakatlar strategiyasi doirasida mamlakat ichki va tashqi siyosatining ustuvor yo‘nalishlari haqida xabardor qilindi.
Harakatlar strategiyasi ijrosiga kirishilganiga qisqa vaqt o‘tganiga qaramay amaliy natijalarga erishilgani alohida qayd etildi. Bu aholini tashvishga solayotgan muammolar hal etilishida, parlament va fuqarolik jamiyati institutlari roli oshirilishida, tadbirkorlik faoliyati sezilarli darajada kuchaytirilishida, shuningdek, Markaziy Osiyoda ishonch va barqarorlik muhiti mustahkamlanib borayotganida namoyon bo‘lmoqda.
Tadbir ishtirokchilari Shavkat Mirziyoyev tomonidan olib borilayotgan islohotlarning yangi yo‘nalishiga yuksak baho berdi. Ko‘rilayotgan chora-tadbirlar keng ko‘lamli, puxta o‘ylangan va amaliy ahamiyatga ega ekani alohida qayd etildi.
Yaponiyalik ekspertlar O‘zbekiston Yaponiyaning tashqi siyosati va tashqi iqtisodiy manfaatlari uchun strategik muhim mamlakat ekanini, davlatlarning strategik sherikligini yanada izchil chuqurlashtirishga ko‘maklashishga tayyorligini ta’kidladi.
O‘zbekiston delegatsiyasining tashrifi davom etmoqda.
Izoh (0)