Nukusdagi I.Savitskiy nomidagi davlat san’at muzeyida A.Shevchenkoning “Chelak ko‘targan ayol” kartinasi restavratsiyasi boshlandi. Bu haqda O‘zA xabar bermoqda.
Joriy yil iyul oyida muzeyda yong‘inga qarshi xavfsizlik tizimining kutilmaganda ishlab ketib, suv sachrashi oqibatida “Chelak ko‘targan ayol” kartinasi shikastlangandi. Madaniyat vazirligi tomonidan ushbu noyob kartinani qayta tiklash uchun Pushkin nomidagi Davlat tasviriy san’at muzeyining restavratsiya va konservatsiya bo‘limi rahbari o‘rinbosari, I.Grabar nomidagi Butunrossiya badiiy ilmiy-restavratsiya va konservatsiya markazining tajribali restavratori Nadejda Koshkina taklif qilindi.
Sentabr oyi avvalidan restavratsiya ishlarini boshlagan mutaxassis kartinaning bo‘yoqli qatlamidagi zarar yetkazilgan maydonni aniqladi. Shuningdek, rasmning shikastlangan qismida buyoq qatlamining eng mayda qismlarini yig‘ish orqali kartinaning butunligini tiklash ishlari amalga oshirildi.
— Kartinada zarur konservatsiyalash ishlari amalga oshirilishi natijasida buzilish holati bartaraf etildi. Kartina butunlay tiklanadi, — deydi restovrator N.Koshkina. — Olib borilgan ishlar natijasiga ko‘ra kartinaning ma’lum qatlamidagi buzilgan joylar ko‘lami aniqlandi.
Hozirda “Chelak ko‘targan ayol” kartinasini tiklashning birinchi qismi yakunlandi.
Izoh (0)