Савицкий музейида «Челак кўтарган аёл» картинаси реставрацияси бошланди

Нукусдаги И.Савицкий номидаги давлат санъат музейида А.Шевченконинг «Челак кўтарган аёл» картинаси реставрацияси бошланди. Бу ҳақда ЎзА хабар бермоқда.

Жорий йил июль ойида музейда ёнғинга қарши хавфсизлик тизимининг кутилмаганда ишлаб кетиб, сув сачраши оқибатида «Челак кўтарган аёл» картинаси шикастланганди. Маданият вазирлиги томонидан ушбу ноёб картинани қайта тиклаш учун Пушкин номидаги Давлат тасвирий санъат музейининг реставрация ва консервация бўлими раҳбари ўринбосари, И.Грабар номидаги Бутунроссия бадиий илмий-реставрация ва консервация марказининг тажрибали реставратори Надежда Кошкина таклиф қилинди.

Сентябрь ойи аввалидан реставрация ишларини бошлаган мутахассис картинанинг бўёқли қатламидаги зарар етказилган майдонни аниқлади. Шунингдек, расмнинг шикастланган қисмида буёқ қатламининг энг майда қисмларини йиғиш орқали картинанинг бутунлигини тиклаш ишлари амалга оширилди.

— Картинада зарур консервациялаш ишлари амалга оширилиши натижасида бузилиш ҳолати бартараф этилди. Картина бутунлай тикланади, — дейди рестовратор Н.Кошкина. — Олиб борилган ишлар натижасига кўра картинанинг маълум қатламидаги бузилган жойлар кўлами аниқланди.

Ҳозирда «Челак кўтарган аёл» картинасини тиклашнинг биринчи қисми якунланди.