Ayni vaqtda O‘zbekistonda 25 mingga yaqin hunarmand bo‘lib, ularning qariyb besh ming nafariga 141 milliard so‘mlik kredit berildi. Hozirda kreditlarni moliya muassasalari orqali rasmiylashtirilishi davom etmoqda, deb yozadi O‘zA.
11-sentabr kuni o‘tkazilgan matbuot anjumanida “Hunarmand” uyushmasi huzurida, hunarmandchilik mahsulotlarini uzoq tuman (shaharlar)dan xarid qilish va yirik shaharlarda sotish hamda eksport qilish uchun savdo-xarid masalalari bilan shug‘ullanuvchi Sraft and art jamiyati tashkil etilgani ma’lum qilindi.
Mazkur korxona mamlakatning turistik obyektlari, diqqatga sazovor joylari, hududlardagi hunarmandlik markazlarida hamda bir qator bozorlarda “Art salon”lar ya’ni amaliy va tasviriy san’at asarlarining savdo-xarid ishlari bilan shug‘ullanuvchi do‘konlar tashkil qiladi. Bundan tashqari, korxona chet el vakolatxonalari, galereyalar va turistik firmalar bilan hamkorlikda ish olib borish, chet ellarda o‘z filiallarini ochish huquqiga ham ega.
“Uyushmamiz xotin-qizlar o‘rtasida hunarmandlikni rivojlantirish, hunarmandlikka oid bilim va ko‘nikmalarini oshirish, ijtimoiy himoyaga muhtoj ayollarni qo‘llab-quvvatlash, ularning bandligini ta’minlashga ko‘maklashmoqda, — deydi ‘Hunarmand’ uyushmasi rais o‘rinbosari Akobir Hakimov. — Shu maqsadda Toshkent viloyatining hunarmandlik kam rivojlangan Oqqo‘rg‘on va Quyi Chirchiq, Toshkent shahrining Chilonzor, Surxondaryo viloyatining Boysun tumani va Termiz shahrida, Qashqadaryo viloyatining Qamashi, Namangan viloyatining Norin va Uychi, Samarqand viloyatining Qo‘shrabot va Nurobod tumanlarida kashtachilik, qo‘lda gilam to‘qish, oddiy metalldan milliy uslubdagi taqinchoqlar tayyorlash, o‘yinchoqlar, esdalik buyumlari yo‘nalishlari bo‘yicha 2 oylik bepul o‘quv kurslari tashkil etildi. Oqqo‘rg‘on va Quyi Chirchiq tumanida ana shu kurslarni bitirgan 100 ga yaqin xotin-qizga hunar o‘rgatilib, bandligi ta’minlandi”.
Hozirda mazkur viloyatlar va Toshkent shahrida 12 ta kurs faoliyat yuritmoqda.
Izoh (0)