Farg‘ona viloyati hokimligida “Atlas bayrami” festivali munosabati bilan matbuot anjumani o‘tkazildi. Unda UNESCO’ning mamlakatimizdagi vakolatxonasi xodimlari, ommaviy axborot vositalari vakillari ishtirok etdi, deb xabar beradi “Daryo” muxbiri Azizjon Ermatov.
Farg‘ona viloyati hokimi Shuhrat G‘aniyev, UNESCO’ning O‘zbekistondagi vakili Dendev Badarch “Atlas bayrami” festivaliga tayyorgarlikva uning dasturi haqida batafsil ma’lumot berdi.
UNESCO ishlari bo‘yicha O‘zbekiston Respublikasi Milliy komissiyasi, Madaniyat vazirligi, Badiiy akademiya, Turizmni rivojlantirish davlat qo‘mitasi, “Hunarmand” uyushmasi, UNESCO’ning O‘zbekistondagi vakolatxonasi va Farg‘ona viloyati hokimligi tomonidan tashkil etilayotgan “Atlas bayrami” festivali 14-sentabr kuni tantanali ochiladi.
Festival doirasida “Buyuk Ipak yo‘lida Sharq va G‘arb madaniyatining o‘zaro ta’siri: Guanjou, Marg‘ilon, Valensiya” mavzusida xalqaro konferensiya, “Hunarmandlar shaharchasi” yarmarkasi tashkil etiladi. Shuningdek, xalq sayillari, xalq musiqa guruhlarining chiqishlari, O‘zbekiston modelyerlari shou-defilesi, konsertlar, kurash musobaqasi, askiyachilar va dorbozlar chiqishlari, “Devzira” osh tanlovi ham o‘tkaziladi.
Ayni paytda, Marg‘ilon hunarmandchilikni rivojlantirish markazida yosh hunarmandlar uchun taniqli ustalar ishtirokida an’anaviy hunarmandchilik hamda liboslar dizayni bo‘yicha mahorat saboqlari bo‘lib o‘tmoqda.
Izoh (0)