Фарғона вилояти ҳокимлигида «Атлас байрами» фестивали муносабати билан матбуот анжумани ўтказилди. Унда UNESCO’нинг мамлакатимиздаги ваколатхонаси ходимлари, оммавий ахборот воситалари вакиллари иштирок этди, деб хабар беради «Дарё» мухбири Азизжон Эрматов.
Фарғона вилояти ҳокими Шуҳрат Ғаниев, UNESCO’нинг Ўзбекистондаги вакили Дендев Бадарч «Атлас байрами» фестивалига тайёргарликва унинг дастури ҳақида батафсил маълумот берди.
UNESCO ишлари бўйича Ўзбекистон Республикаси Миллий комиссияси, Маданият вазирлиги, Бадиий академия, Туризмни ривожлантириш давлат қўмитаси, «Ҳунарманд» уюшмаси, UNESCO’нинг Ўзбекистондаги ваколатхонаси ва Фарғона вилояти ҳокимлиги томонидан ташкил этилаётган «Атлас байрами» фестивали 14 сентябрь куни тантанали очилади.
Фестиваль доирасида «Буюк Ипак йўлида Шарқ ва Ғарб маданиятининг ўзаро таъсири: Гуанчжоу, Марғилон, Валенция» мавзусида халқаро конференция, «Ҳунармандлар шаҳарчаси» ярмаркаси ташкил этилади. Шунингдек, халқ сайиллари, халқ мусиқа гуруҳларининг чиқишлари, Ўзбекистон моделерлари шоу-дефилеси, концертлар, кураш мусобақаси, аскиячилар ва дорбозлар чиқишлари, «Девзира» ош танлови ҳам ўтказилади.
Айни пайтда, Марғилон ҳунармандчиликни ривожлантириш марказида ёш ҳунармандлар учун таниқли усталар иштирокида анъанавий ҳунармандчилик ҳамда либослар дизайни бўйича маҳорат сабоқлари бўлиб ўтмоқда.
Изоҳ (0)