Мамлакатимиз мустақиллигининг 27 йиллиги муносабати билан Самарқанд вилоят ички ишлар бошқармаси Тезкор вазифаларни бажарувчи махсус отряди ҳамда вилоят соғлиқни сақлаш бошқармаси ҳамкорлигида Ургут туманида жойлашган «Ургут мурувват ва ногиронлар учун интернат уйи»да байрам тадбири бўлиб ўтди. Бу ҳақида «Дарё» мухбири Фарҳод Норбўтаев хабар бермоқда.
Бугунги кунда 445 нафар 1 ва 2 гуруҳ васийликка олинган ва руҳий касалликка чалинган ногиронлиги бўлганлар даволанаётган ушбу маскандаги байрам кечаси интернат уйи даволанувчилари учун ҳақиқий шодиёнага айланди.
Тадбирда сўзга чиққанлар бу ерда даволанувчи инсонларни байрам билан табриклаб, уларнинг кўнглини кўтаришди. Шунингдек, тўшакка михланиб қолган ногиронларнинг ҳам холидан хабар олиниб, уларга байрамона таомлар улашилди.
— Улуғ айём кунларида кўнгли ярим инсонлар ҳолидан хабар олишдек хайрли ва савобли иш бўлмаса керак. Бугун улар байрамона кайфиятда, бир пиёла чой устида суҳбат қуриб, хурсандчилигидан рақсга ҳам тушишди, -дейди вилоят ИИБ матбуот хизмати раҳбари Ширин Нормуродова.
— Қолаверса, бундай байрам тадбирлари ҳамюртларимизни она Ватанга бўлган садоқати, ота-она, қариндош-уруғларга бўлган меҳрини яна бир бор намоён этиб, уларнинг қалбида эзгу хислатларни оширади.
Байрам муносабати билан Самарқанд шаҳар ИИО ФМБ 3-сон ИИБ ходимлари Паяриқ тумани Жавхар ота МФЙ Еттиуруғ қишлоғида истиқомат қилувчи, церебрал фалажига чалинган Ҳасан ва Ҳусан Тошпўлатовларнинг ҳам ҳолидан хабар олишди.
Айни пайтда 11 ёшни қаршилаган Ҳасан ва Ҳусан соғайиб кетишлари учун саховатпеша ҳамюртларимизнинг кўмагига муҳтож эканлиги ОАВда баён этилган эди. ИИБ ходимлари ижтимоий кўмакка муҳтож бўлган оилага 4 миллион сўм пул ва янги ўқув йилига китоблар совға қилинди.
Изоҳ (0)