2—3-sentabr kunlari O‘zbekiston Turizmni rivojlantirish davlat qo‘mitasi va Qashqadaryo viloyati hokimligi hamkorligida Shahrisabz va Qarshi shaharlarida amalga oshirilayotgan iqtisodiy o‘zgarishlar, turizm salohiyatini rivojlantirishga qaratilgan chora-tadbirlar natijasi bilan tanishish maqsadida mediatur tashkil etildi. Bu haqda O‘zA xabar berdi.
Turli ommaviy axborot vositalari vakillari ishtirok etgan mazkur mediatur dasturiga muvofiq, dastlabki tanishuv Shahrisabz shahri va bu qadim shaharda shu yilning 6-sentyabr kuni boshlanadigan xalqaro maqom san’ati anjumaniga tayyorgarlik jarayonlari bilan bog‘liq bo‘ldi.
Shahrisabz shahri o‘tmish va bugunni bir-biriga bog‘lovchi markazga aylanmoqda. Bunga birinchi marotaba tashkil etilayotgan nufuzli festival va uni o‘tkazish uchun ko‘rilayotgan ulkan tayyorgarlik ishlari yaqqol misoldir. Negaki, katta hududni o‘z ichiga olgan Oqsaroy yodgorligi atrofida shaharda mavjud 25 ta tarixiy obidaning 16 tasi joylashgan.
Shu bilan birga, bu yerda yaratilayotgan dekoratsiyalar rang-barangligi, o‘tmish udumlari bilan hamohangligi kishini hayratlantiradi. Yana bir e’tiborli jihati, unda har bir viloyatning yashash tarzi, an’analarini o‘zida ifoda etgan bu kabi dekoratsiyalar shahrisabzliklar, mehmonlar va xorijliklarni befarq qoldirmaydi.
Ta’kidlash kerakki, anjumanda 75 ta davlatdan vakillar ishtirok etishi kutilmoqda. Festival doirasida turli tadbirlar, xususan, xalqaro tanlov, konferensiya, etnografik ansambllar chiqishlari va konsert dasturlari namoyish etiladi.
Tadbir doirasida Qashqadaryo viloyati hokimi Zafar Ro‘ziyev mediatur ishtirokchilari bilan uchrashdi.
Uchrashuvda viloyat hokimi Qashqadaryo viloyatida islohotlarga monand ro‘y berayotgan yangiliklar va bunyokorlik ishlariga alohida e’tibor qaratib, bunda Shahrisabz shahridagi o‘zgarishlar va xalqaro maqom san’ati anjumanining o‘tkazilishi, uning xalqaro hamjamiyatdagi ahamiyati mamlakat turistik salohiyatini jahonga tanitishda muhim ekanini ta’kidladi.
Mediaturning ikkinchi kunida qatnashchilar Qarshi shahrining bugungi ko‘rinishi, shahardagi tarixiy qadamjolar va yangi obyektlar bilan tanishishga muvaffaq bo‘ldi.
Izoh (0)