2—3 сентябрь кунлари Ўзбекистон Туризмни ривожлантириш давлат қўмитаси ва Қашқадарё вилояти ҳокимлиги ҳамкорлигида Шаҳрисабз ва Қарши шаҳарларида амалга оширилаётган иқтисодий ўзгаришлар, туризм салоҳиятини ривожлантиришга қаратилган чора-тадбирлар натижаси билан танишиш мақсадида медиатур ташкил этилди. Бу ҳақда ЎзА хабар берди.
Турли оммавий ахборот воситалари вакиллари иштирок этган мазкур медиатур дастурига мувофиқ, дастлабки танишув Шаҳрисабз шаҳри ва бу қадим шаҳарда шу йилнинг 6-сентябр куни бошланадиган халқаро мақом санъати анжуманига тайёргарлик жараёнлари билан боғлиқ бўлди.
Шаҳрисабз шаҳри ўтмиш ва бугунни бир-бирига боғловчи марказга айланмоқда. Бунга биринчи маротаба ташкил этилаётган нуфузли фестиваль ва уни ўтказиш учун кўрилаётган улкан тайёргарлик ишлари яққол мисолдир. Негаки, катта ҳудудни ўз ичига олган Оқсарой ёдгорлиги атрофида шаҳарда мавжуд 25 та тарихий обиданинг 16 таси жойлашган.
Шу билан бирга, бу ерда яратилаётган декорациялар ранг-баранглиги, ўтмиш удумлари билан ҳамоҳанглиги кишини ҳайратлантиради. Яна бир эътиборли жиҳати, унда ҳар бир вилоятнинг яшаш тарзи, анъаналарини ўзида ифода этган бу каби декорациялар шаҳрисабзликлар, меҳмонлар ва хорижликларни бефарқ қолдирмайди.
Таъкидлаш керакки, анжуманда 75 та давлатдан вакиллар иштирок этиши кутилмоқда. Фестиваль доирасида турли тадбирлар, хусусан, халқаро танлов, конференция, этнографик ансамбллар чиқишлари ва концерт дастурлари намойиш этилади.
Тадбир доирасида Қашқадарё вилояти ҳокими Зафар Рўзиев медиатур иштирокчилари билан учрашди.
Учрашувда вилоят ҳокими Қашқадарё вилоятида ислоҳотларга монанд рўй бераётган янгиликлар ва бунёкорлик ишларига алоҳида эътибор қаратиб, бунда Шаҳрисабз шаҳридаги ўзгаришлар ва халқаро мақом санъати анжуманининг ўтказилиши, унинг халқаро ҳамжамиятдаги аҳамияти мамлакат туристик салоҳиятини жаҳонга танитишда муҳим эканини таъкидлади.
Медиатурнинг иккинчи кунида қатнашчилар Қарши шаҳрининг бугунги кўриниши, шаҳардаги тарихий қадамжолар ва янги объектлар билан танишишга муваффақ бўлди.
Изоҳ (0)