O‘zbekistonda Yellowstone (Yellouston) milliy bog‘i yoki Grand Canyon (Grand-Kanon) bog‘iga o‘xshab ketadigan Markaziy Osiyodagi birinchi milliy bog‘ni yaratish bo‘yicha loyiha amalga oshiriladi. Bu haqda Turizmni rivojlantirish davlat qo‘mitasi raisining birinchi o‘rinbosari Ulug‘bek Qosimxo‘jayev Jizzaxdagi Xalqaro investitsiya forumida aytib o‘tdi, deb yozadi “Podrobno.uz”.
“Masalan, Yellowstone’ga har yili taxminan 20 million kishi tashrif buyuradi. Bu ham aholini, ham ekoturistik hudud holatini zarur darajada ushlab turish uchun katta hajmdagi qo‘shimcha mablag‘lar demakdir. Shu sababli biz Jizzax viloyati hokimligi bilan birgalikda Baxmal va Zomin tumanlari sayyohlik klasteri loyihasini ishlab chiqdik”, — dedi u.
“Ekoturizm, iqtisodiy tarmoq sifatida esdalik sovg‘alari sotuvchilaridan tortib, mehmonxonalar egalarigacha bo‘lgan aholining daromadlarida katta o‘zgarishni hosil qiladi. Hozir Zominga 50—100 ming kishi kelib-ketadi, bor-yo‘g‘i uch oy ichida biz bu raqamni ko‘p bora oshirishni hamda turistik mavsumni kengaytirishni rejalashtirmoqdamiz”, — dedi Qosimxo‘jayev.
Umuman olganda, turistik klaster ekologik turizm, agroturizm va etnik turizmdan iborat uchta asosiy yo‘nalishni o‘z ichiga oladi. Shu konsepsiyadan kelib chiqib, Baxmal va Zomin tumanlari hududi zarur infratuzilmani qurish uchun uchta qismga ajratiladi.
Izoh (0)