Mustaqillik bayrami shodiyonalari munosabati bilan Farg‘ona viloyatidagi shahar va tuman “Oila” markazlariga Spark avtomashinalari berildi. Bu haqda “Daryo” muxbiri Azizjon Ermatov xabar bermoqda.
“Oila” markazlari shahar va tuman bo‘linmalari faoliyatini qo‘llab-quvvatlash maqsadida ajratilgan Spark avtomashanilarini viloyat hokimi Shuhrat G‘aniyev tantanali ravishda topshirdi.
Davlat rahbarining 2018-yil 2-fevraldagi “Xotin-qizlarni qo‘llab-quvvatlash va oila institutini mustahkamlash sohasidagi faoliyatni tubdan takomillashtirish chora-tadbirlari to‘g‘risida”gi farmoniga ko‘ra, Vazirlar Mahkamasi huzurida “Oila” ilmiy-amaliy tadqiqot markazi va uning hududiy bo‘linmalari tashkil etilib, aniq vazifalari, maqomi belgilab berildi.
O‘tgan davr mobaynida “Oila” markazlari tomonidan viloyatda yoshlarni oilaviy hayotga tayyorlash, oiladagi nizoli holatlarni hal qilishning huquqiy va psixologik asoslarini o‘rgatish, ajrishlarning oldini olish borasida bir qator ishlar amalga oshirildi.
– “Oila” markazi Quvasoy shahar bo‘linmasi tomonidan sayyor qabullar uyushtirilmoqda. Tushuntirish va targ‘ibot ishlari natijasida o‘tgan 7 oyda ajrimlar soni 2017-yilga nisbatan 60 taga kamaydi, 8 oy davomida 97 ta oila yarashtirildi. Hatto sud qarori bilan ajrim masalasi hal bo‘lgan Abdurahimovlar oilasi qayta nikohdan o‘tish uchun ariza topshirdi. Xotin-qizlar o‘rtasidagi jinoyatchilik teng yarmiga kamaydi, – deydi markaz rahbari Mag‘firatxon Hasanova.
Izoh (0)