Oʻzbekiston Prezidenti Shavkat Mirziyoyevning tashabbusi bilan boshlangan Qarshi—Kitob temiryoʻl liniyasini modernizatsiya qilish va elektrlashtirish loyihasi toʻliq nihoyasiga yetkazildi. “O‘zbekiston temir yoʻllari” kompaniyasidan maʼlum qilishlaricha, umumiy uzunligi qariyib 124 kilometr boʻlgan mazkur loyiha qisqa fursatda sifatli amalga oshirilgan.
Ushbu yoʻnalishda vokzallar yangidan qurilib, stansiyalar rekonstruksiya qilindi. Ikkita koʻprik, 20 ga yaqin sunʼiy inshoot qurildi. Mavjud temiryoʻllar modernizatsiya qilinib, atrofini panjara bilan oʻrash ishlari amalga oshirildi. Qurilish ishlariga 100 ga yaqin zamonaviy texnika, 300 nafardan ziyod mutaxassis jalb qilindi.
Soha energetiklari tomonidan loyiha doirasida rejalashtirilgan 94 kilometr masofaga temir-beton ustunlari oʻrnatish, ularga konsollar ilish, kontakt simlari tortish kabi barcha ishlar toʻliq yakunlandi. Bundan tashqari oʻtgan vaqt mobaynida bitta nim tortish stantsiyasi ham qurib ishga tushirildi.
“Mutaxassislar Qarshi—Kitob yoʻnalishida ilk bor elektrovoz hamda ʻAfrosiyobʻ zamonaviy elektropoezdini harakatlantirib texnik sinovlarni boshlab yubordi. Mustaqilligimizning 27 yilligi shodiyonasi arafasida ushbu loyiha mamlakatimiz aholisi va mehmonlariga munosib sovgʻa boʻladi”, — deyiladi temiryoʻl kompaniyasi axborotida.
Izoh (0)