Ўзбекистон Президенти Шавкат Мирзиёевнинг ташаббуси билан бошланган Қарши—Китоб темирйўл линиясини модернизация қилиш ва электрлаштириш лойиҳаси тўлиқ ниҳоясига етказилди. «Ўзбекистон темир йўллари» компаниясидан маълум қилишларича, умумий узунлиги қарийиб 124 километр бўлган мазкур лойиҳа қисқа фурсатда сифатли амалга оширилган.
Ушбу йўналишда вокзаллар янгидан қурилиб, станциялар реконструкция қилинди. Иккита кўприк, 20 га яқин сунъий иншоот қурилди. Мавжуд темирйўллар модернизация қилиниб, атрофини панжара билан ўраш ишлари амалга оширилди. Қурилиш ишларига 100 га яқин замонавий техника, 300 нафардан зиёд мутахассис жалб қилинди.
Соҳа энергетиклари томонидан лойиҳа доирасида режалаштирилган 94 километр масофага темир-бетон устунлари ўрнатиш, уларга консоллар илиш, контакт симлари тортиш каби барча ишлар тўлиқ якунланди. Бундан ташқари ўтган вақт мобайнида битта ним тортиш станцияси ҳам қуриб ишга туширилди.
«Мутахассислар Қарши—Китоб йўналишида илк бор электровоз ҳамда ʻАфросиёбʻ замонавий электропоэздини ҳаракатлантириб техник синовларни бошлаб юборди. Мустақиллигимизнинг 27 йиллиги шодиёнаси арафасида ушбу лойиҳа мамлакатимиз аҳолиси ва меҳмонларига муносиб совға бўлади», — дейилади темирйўл компанияси ахборотида.
Изоҳ (0)