Oʻzbekiston bosh vaziri Abdulla Aripov “Fransiyaga oliy darajadagi tashrif davomidagi madaniy-gumanitar tadbirlarga tayyorgarlik koʻrish va ularni oʻtkazish chora-tadbirlari toʻgʻrisida”gi qarorni imzoladi. Qaror “Lex.uz”da eʼlon qilindi.
Qarorda maʼlum qilinishicha, Oʻzbekiston Prezidenti Shavkat Mirziyoyev 2018-yilning oktabr oyida oliy darajadagi tashrif bilan Fransiyaga boradi. Hukumatning ushbu qarori bilan ushbu tashrifning madaniy-gumanitar qismiga tayyorgarlik koʻrish boʻyicha “yoʻl xaritasi” tasdiqlangan.
Tashrifning ushbu qismiga tayyorgarlik doirasida Madaniyat vazirligiga, istisno tariqasida, tender (tanlov) savdolari oʻtkazmasdan, eng yaxshi takliflarni tanlab olish yoʻli bilan tovarlarni yetkazib beruvchilar, ishlarni bajaruvchilar va xizmatlarni koʻrsatuvchilar bilan toʻgʻridan-toʻgʻri shartnomalar tuzishga ruxsat berildi.
Shuningdek, Madaniyat vazirligi huzurida Fransiya madaniyat markazi tashkil etiladi. Qarorda qayd etilishicha, ushbu markazni tashkil etish taklifi Madaniyat vazirligi, Turizmni rivojlantirish davlat qoʻmitasi, Moliya vazirligi, Davlat raqobat qoʻmitasi va “Sen yolgʻiz emassan” respublika ijtimoiy bolalar jamgʻarmasi tomonidan berilgan.
Izoh (0)