Bugun Samarqand viloyat hokimligida Xalq deputatlari viloyat Kengashining 55-sessiyasi bo‘lib o‘tdi. Sessiyani viloyat hokimi vazifasini bajaruvchi Erkinjon Turdimov boshqardi. Bu haqida “Daryo” muxbiri Farhod Norbo‘tayev xabar bermoqda.
Sessiyada dastlab, Xalq deputatlari Samarqand viloyat Kengashida bo‘shab qolgan o‘ringa o‘tkazilgan saylov natijalari to‘g‘risida viloyat saylov komissiyasining axboroti tinglandi. Unga ko‘ra, Xalq deputatlari viloyat Kengashiga 7-Istiqlol saylov okrugidan Turdimov Erkinjon Oqbo‘tayevichning vakolati tasdiqlanganligini bildirib o‘tdi.
Shundan so‘ng aholiga birlamchi tibbiy-sanitariya yordami ko‘rsatilishi, uning o‘z vaqtida yuqori sifatli bo‘lishini ta’minlash borasida amalga oshirilayotgan ishlar to‘g‘risida Samarqand viloyat hokimligi sog‘liqni saqlash boshqarmasi boshlig‘i Aziz Jo‘rayevning axboroti tinglandi.
Ta’kidlanishicha, joriy yilning o‘tgan davrida “Obod qishloq” davlat dasturi asosida 81746 nafar fuqarolar tibbiy ko‘rikdan o‘tkazilib, ularning 35981 nafarida turli xil kasalliklar borligi aniqlangan. Shundan 35262 nafari ambulator, 720 nafari esa statsionar sharoitida sog‘lomlashtirilgan. Yilning ikkinchi yarmida tug‘ma nuqsonlar bilan tug‘ilish va bolalikdan nogironlikni oldini olish maqsadida poliklinikalarga biriktirilgan xududdagi barcha homilador ayollarning homiladorlikni 12 haftasigacha to‘liq prenatal skriningdan o‘tkazilishi belgilandi.
Sessiya kun tartibida yana bir masala – “Sog‘lom ovqatlanishni tashkil etish hamda aholi o‘rtasida sog‘lom turmush tarzini targ‘ib qilish borasida viloyatda amalga oshirilayotgan ishlarning ahvoli to‘g‘risida” O‘zbekiston Respublikasi Oliy majlis Qonunchilik palatasi deputati Adham Shodmonov axborot berdi.
Joriy yilning 15—18-avgust kunlari viloyatda deputatlar tomonidan aholini sog‘lom ovqatlanish maqsadida Jomboy va Ishtixon tumanlari davlat sanitariya epidimologiya markazlari faoliyatlari o‘rganib chiqilgan. O‘rganish jarayonida mazkur tuman DSENM labaratoriyalari suv bilan ta’minlanmaganligi, jihozlar manan eskirganligi, namunalar hisobini keltirish, tahlil natijalarini ro‘yxatga olish, belgilangan reja ijrosini ta’minlash masalalarida e’tiborsizlik, chalkashliklar va tartibsizliklarga yo‘l qo‘yib kelinayotganligi bildirib o‘tildi.
Xususan, Jomboy tuman DSENM labaratoriyasida maktabgacha ta’lim muassasidan keltirilgan “no‘xat sho‘rva” va “vermishel kabob” ovqatlari tahlilida har ikkala ovqatga ham go‘sht solinmaganligi, ikkinchi ovqat energiyasi talab darajasidan 40 foiz kam chiqqan bo‘lishiga qaramasdan iste‘mol qilishga ruxsat berilganligi qayd etilgan.
Sessiyada to‘y-hashamlar, oilaviy tantanalar, maraka va marosimlar, marhumlarning xotirasiga bag‘ishlangan tadbirlar o‘tkazilishini tartibga solish masalalari bo‘yicha viloyat komissiyasining tarkibi belgilab olindi.
Sessiyada tashkiliy masala ham ko‘rildi. Shu vaqtga qadar viloyat hokimining qishloq va suv xo‘jaligi masalalari bo‘yicha o‘rinbosari bo‘lib ishlab kelgan Kamoliddin Qurbonov o‘z vazifasidan ozod etilib, uning o‘rniga Abdumajid Norqulov vaqtinchalik vazifasini bajaruvchi etib tayinlandi. Shuningdek, viloyat hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari sifatida ishlab kelgan O‘tkir Abdullayev ham o‘z vazifasidan ozod etilib, o‘rniga Akmal Shukurov ushbu vazifani vaqtinchalik bajaruvchi etib tayinlandi.
Izoh (0)