Бугун Самарқанд вилоят ҳокимлигида Халқ депутатлари вилоят Кенгашининг 55-сессияси бўлиб ўтди. Сессияни вилоят ҳокими вазифасини бажарувчи Эркинжон Турдимов бошқарди. Бу ҳақида «Дарё» мухбири Фарҳод Норбўтаев хабар бермоқда.
Сессияда дастлаб, Халқ депутатлари Самарқанд вилоят Кенгашида бўшаб қолган ўринга ўтказилган сайлов натижалари тўғрисида вилоят сайлов комиссиясининг ахбороти тингланди. Унга кўра, Халқ депутатлари вилоят Кенгашига 7-Истиқлол сайлов округидан Турдимов Эркинжон Оқбўтаевичнинг ваколати тасдиқланганлигини билдириб ўтди.
Шундан сўнг аҳолига бирламчи тиббий-санитария ёрдами кўрсатилиши, унинг ўз вақтида юқори сифатли бўлишини таъминлаш борасида амалга оширилаётган ишлар тўғрисида Самарқанд вилоят ҳокимлиги соғлиқни сақлаш бошқармаси бошлиғи Азиз Жўраевнинг ахбороти тингланди.
Таъкидланишича, жорий йилнинг ўтган даврида «Обод қишлоқ» давлат дастури асосида 81746 нафар фуқаролар тиббий кўрикдан ўтказилиб, уларнинг 35981 нафарида турли хил касалликлар борлиги аниқланган. Шундан 35262 нафари амбулатор, 720 нафари эса стационар шароитида соғломлаштирилган. Йилнинг иккинчи ярмида туғма нуқсонлар билан туғилиш ва болаликдан ногиронликни олдини олиш мақсадида поликлиникаларга бириктирилган худуддаги барча ҳомиладор аёлларнинг ҳомиладорликни 12 ҳафтасигача тўлиқ пренатал скринингдан ўтказилиши белгиланди.
Сессия кун тартибида яна бир масала – «Соғлом овқатланишни ташкил этиш ҳамда аҳоли ўртасида соғлом турмуш тарзини тарғиб қилиш борасида вилоятда амалга оширилаётган ишларнинг аҳволи тўғрисида» Ўзбекистон Республикаси Олий мажлис Қонунчилик палатаси депутати Адҳам Шодмонов ахборот берди.
Жорий йилнинг 15—18 август кунлари вилоятда депутатлар томонидан аҳолини соғлом овқатланиш мақсадида Жомбой ва Иштихон туманлари давлат санитария эпидимология марказлари фаолиятлари ўрганиб чиқилган. Ўрганиш жараёнида мазкур туман ДСЭНМ лабараториялари сув билан таъминланмаганлиги, жиҳозлар манан эскирганлиги, намуналар ҳисобини келтириш, таҳлил натижаларини рўйхатга олиш, белгиланган режа ижросини таъминлаш масалаларида эътиборсизлик, чалкашликлар ва тартибсизликларга йўл қўйиб келинаётганлиги билдириб ўтилди.
Хусусан, Жомбой туман ДСЭНМ лабараториясида мактабгача таълим муассасидан келтирилган «нўхат шўрва» ва «вермишель кабоб» овқатлари таҳлилида ҳар иккала овқатга ҳам гўшт солинмаганлиги, иккинчи овқат энергияси талаб даражасидан 40 фоиз кам чиққан бўлишига қарамасдан истеъмол қилишга рухсат берилганлиги қайд этилган.
Сессияда тўй-ҳашамлар, оилавий тантаналар, марака ва маросимлар, марҳумларнинг хотирасига бағишланган тадбирлар ўтказилишини тартибга солиш масалалари бўйича вилоят комиссиясининг таркиби белгилаб олинди.
Сессияда ташкилий масала ҳам кўрилди. Шу вақтга қадар вилоят ҳокимининг қишлоқ ва сув хўжалиги масалалари бўйича ўринбосари бўлиб ишлаб келган Камолиддин Қурбонов ўз вазифасидан озод этилиб, унинг ўрнига Абдумажид Норқулов вақтинчалик вазифасини бажарувчи этиб тайинланди. Шунингдек, вилоят ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари сифатида ишлаб келган Ўткир Абдуллаев ҳам ўз вазифасидан озод этилиб, ўрнига Акмал Шукуров ушбу вазифани вақтинчалик бажарувчи этиб тайинланди.
Изоҳ (0)