Venesuela prezidenti Nikolas Maduro mamlakat aholisi uchun yoqilg‘iga davlat subsidiyalari joriy qilingan holda, mamlakatda benzinga nisbatan bozor narxlari o‘rnatilishini ma’lum qildi, deb yozadi Spot.
Davlat rahbari yoqilg‘i narxlari xalqaro darajagacha ko‘tarilishini tasdiqladi. Bu Lotin Amerikasining boshqa mamlakatlariga benzin kontrabandasi oldini olish uchun qilinadi.
“Benzin kontrabandasiga chek qo‘yishning yagona usuli — o‘z narxlarimizni xalqaro narxlarga yetkazib, bizning mahsulotimizni Kolumbiya va Karib havzasiga olib o‘tadigan mafiya ustidan g‘alaba qozonish, shu sababli men venesuelaliklar uchun to‘g‘ridan-to‘g‘ri subsidiyalar kiritilishini ma’qullayman”, — dedi Maduro.
Bungacha Venesuelada benzin ishlab chiqaruvchilari va sotuvchilari uchun subsidiyalar tizimi amal qilar edi, shu sababli mamlakatda yoqilg‘i narxlari dunyodagi eng pastlaridan biri edi. Shu bilan birga, hukumat benzin narxlari keskin oshib ketishiga yo‘l qo‘ymas edi, natijada narx yillar davomida o‘zgarishsiz saqlanar edi.
2018-yilning 13-avgusti holatiga ko‘ra, Venesuelada benzin narxi 1 litr uchun qariyb 1 sentni tashkil qilgan.
Avvalgi tizimdan farqli o‘laroq, endi Venesuela hukumati yoqilg‘i quyish shoxobchalarida benzin uchun past narxlarni kafolatlashdan voz kechib, buning o‘rniga aholi uchun yoqilg‘iga xarajatlar kompensatsiyasiga o‘tmoqchi.
Benzinga to‘g‘ridan-to‘g‘ri subsidiyalarni “milliy karta” deb ataluvchi identifikatsiya hujjatiga ega bo‘lgan shaxslar olishi mumkin. Bunda mamlakat hukumati tomonidan olib borilgan avtotransportni ro‘yxatga olish chog‘ida avtomobilni ro‘yxatdan o‘tkazganlargina pulni qo‘lga kiritishi mumkin.
Izoh (0)