2025-yil I yarmida soliq to‘lamaslik xavfi yuqori bo‘lgan 2 ming 150 ta korxonada tekshiruv o‘tkazildi. Bu haqda Soliq qo‘mitasi xabar berdi.
Maʼlum qilinishicha, olti oy davomida o‘tkazilgan auditda 1 ming 64 ta korxona 13,1 trln so‘mlik soliq bazasini yashirgan. Jumladan, 386 ta korxona 4,3 trln so‘mlik sotilgan tovarni umuman ko‘rsatmagan.
Tekshirilgan 325 korxona omborida mavjud bo‘lmagan 3,9 trln so‘mlik tovarni “bor” deb hisobga kiritgan. Qolgan 353 ta korxonada 4,9 trln so‘mlik tovar hujjatsiz saqlangan yoki sotilgan.
Soliq bazasini yashirgan yuqoridagi korxonalarga nisbatan jami 2,6 trln so‘m jarima qo‘llanilgan.
Qoidabuzarliklar katta qismi quyidagi sohalarda aniqlangan:
- Savdo va ovqatlanish — 4,2 trln so‘m (58,6 foiz)
- Ishlab chiqarish — 916,8 mlrd so‘m;
- Qurilish — 775,2 mlrd so‘m.
Qolgan qoida buzilishlar qishloq xo‘jaligi, xizmat ko‘rsatish, transport va boshqa sohalarga to‘g‘ri kelgan.
“Bugungi kunda aniqlangan soliq summalaridan to‘lov muddati kelgan 6,6 trln so‘mning 1,2 trln so‘mi (18,7 foiz) to‘lab berildi”, deyiladi qo‘mita xabarida.
Joriy yil aprelida mamlakatda jami 8,5 trln so‘mlik to‘lanmagan soliqlar borligi aytilgandi. 2025-yil I yarmida soliq huquqbuzarliklari haqida xabar bergan fuqarolarga 17,7 mlrd so‘m mukofot pullari to‘langani xabar qilingandi.
Izoh (0)