Joriy yilning bahorida xitoylik tadbirkor Kuan Rumbo Olmazor tumanidagi kichik sanoat zonasidan bino olib, O‘zbekistonda o‘z biznesini boshlagan edi, deb yozadi O‘zA. Ammo Majburiy ijro byurosi vakillari kelib, unga korxona binosi sotilishini ma’lum qildi.
Oradan o‘tgan vaqt davomida u butkul tashlandiq holga kelib qolgan binoni tozalab, tartibga keltirdi. Zanglamaydigan metalldan oshxona anjomlari tayyorlashga mo‘ljallangan zamonaviy uskunalarni Xitoydan olib keldi. Montaj ishlarini yakunlab, 30 nafar yosh yigitga uskunalarni boshqarish darslarini o‘tishni boshlamoqchi bo‘lib turganda, MIBdan kelgan vakillar korxona binosini sotilishini aytishdi.
Boshlanishiga 500 ming dollar sarmoya kiritib, yana mablag‘ olib kelishni o‘ylab turgan investor bundan hayratda.
O‘zbekistonda xorijiy investitsiyalarni jalb etish, investorlarga sharoitlar yaratish borasida qator ishlar amalga oshirilayotganda ularga berilgan bino nega sotuvga qo‘yilmoqda? Bu savolga hudud rahbarlari shunday javob berdi: “Tuman soliq idorasi hech narsani, hatto Vazirlar Mahkamasi qarorini ham tan olmay, bizga MIB xodimlarini yubormoqda. Aslida hech qanday qarzdorlik ham, qarz ham yo‘q. Vaholanki, jamiyatning 01.07.2017-yil holatiga budjet, davlat maqsadli jamg‘armalari bo‘yicha mavjud qarzdorliklari va unga hisoblangan penya hisobiga davlat ulushi oshirilishi belgilangan. Biz topshiriq ijrosini ta’minladik. Biroq... Toshkent shahar davlat soliq inspeksiyasi...”
Tuman soliq idorasi vakillari jamiyatni qarzdorlikda ayblab, hisob raqamiga band solganligi sababli hududda ish boshlagan tadbirkorlik subyektlariga qulay sharoit yaratish, ularni energiya resurslari bilan ta’minlash imkoni bo‘lmayotgan ekan. Eng yomoni MIB jamiyat hududidagi, qisman tadbirkorlarga ijaraga berilgan binoni sotish chorasini ko‘rmoqda. Bundan esa tadbirkorlar xavotirda.
Tadbirkorlar va ishbilarmonlar harakati – O‘zbekiston Liberal-demokratik partiyasining tumandagi vakillari joriy yilning 31-iyulida hududdagi tadbirkorlar bilan uchrashgani, “Olmazor kichik sanoat zonasi“da faoliyat yuritayotgan tadbirkorlarning bir qator muammolari aniqlangani, Deputatlik guruhi bilan birgalikda bu muammolar yechimini topish choralari ko‘rilayotganini ma’lum qildi.
“Aslida muammo nimada, xorijiy investorni jalb etish borasida hatto Prezident jon kuydirib turganda MIB va soliq idoralari xodimlari nimani o‘ylab bu ishlarni boshladi ekan? — degan savol ko‘tariladi maqolada. — Vaholanki, oldin bu hududda faoliyat yuritgan “Mikond”ning 9 milliard qarzi bo‘lib, yer kichik sanoat zonasiga o‘tgach, qarz ham unga meros bo‘lib qolgan. Shunga qaramay Vazirlar Mahkamasining qaroriga ko‘ra, qarzdorlik kechilgan va Toshkent shahar hokimligi tomonidan o‘tkazilgan tanlov asosida joylar tadbirkorlarga imtiyozli ravishda 10 yillik muddat bilan ijaraga berilgan.
Ayni vaqtda esa soliq idorasining talabiga ko‘ra, MIB tomonidan xatlov ishlari olib borilmoqda. Bundan esa tadbirkorlar aziyat chekmoqda. Investorlar esa ketish kayfiyatida.
Izoh (0)