Жорий йилнинг баҳорида хитойлик тадбиркор Куан Румбо Олмазор туманидаги кичик саноат зонасидан бино олиб, Ўзбекистонда ўз бизнесини бошлаган эди, деб ёзади ЎзА. Аммо Мажбурий ижро бюроси вакиллари келиб, унга корхона биноси сотилишини маълум қилди.
Орадан ўтган вақт давомида у буткул ташландиқ ҳолга келиб қолган бинони тозалаб, тартибга келтирди. Зангламайдиган металлдан ошхона анжомлари тайёрлашга мўлжалланган замонавий ускуналарни Хитойдан олиб келди. Монтаж ишларини якунлаб, 30 нафар ёш йигитга ускуналарни бошқариш дарсларини ўтишни бошламоқчи бўлиб турганда, МИБдан келган вакиллар корхона биносини сотилишини айтишди.
Бошланишига 500 минг доллар сармоя киритиб, яна маблағ олиб келишни ўйлаб турган инвестор бундан ҳайратда.
Ўзбекистонда хорижий инвестицияларни жалб этиш, инвесторларга шароитлар яратиш борасида қатор ишлар амалга оширилаётганда уларга берилган бино нега сотувга қўйилмоқда? Бу саволга ҳудуд раҳбарлари шундай жавоб берди: «Туман солиқ идораси ҳеч нарсани, ҳатто Вазирлар Маҳкамаси қарорини ҳам тан олмай, бизга МИБ ходимларини юбормоқда. Аслида ҳеч қандай қарздорлик ҳам, қарз ҳам йўқ. Ваҳоланки, жамиятнинг 01.07.2017 йил ҳолатига бюджет, давлат мақсадли жамғармалари бўйича мавжуд қарздорликлари ва унга ҳисобланган пеня ҳисобига давлат улуши оширилиши белгиланган. Биз топшириқ ижросини таъминладик. Бироқ... Тошкент шаҳар давлат солиқ инспекцияси...»
Туман солиқ идораси вакиллари жамиятни қарздорликда айблаб, ҳисоб рақамига банд солганлиги сабабли ҳудудда иш бошлаган тадбиркорлик субъектларига қулай шароит яратиш, уларни энергия ресурслари билан таъминлаш имкони бўлмаётган экан. Энг ёмони МИБ жамият ҳудудидаги, қисман тадбиркорларга ижарага берилган бинони сотиш чорасини кўрмоқда. Бундан эса тадбиркорлар хавотирда.
Тадбиркорлар ва ишбилармонлар ҳаракати – Ўзбекистон Либерал-демократик партиясининг тумандаги вакиллари жорий йилнинг 31 июлида ҳудуддаги тадбиркорлар билан учрашгани, «Олмазор кичик саноат зонаси«да фаолият юритаётган тадбиркорларнинг бир қатор муаммолари аниқлангани, Депутатлик гуруҳи билан биргаликда бу муаммолар ечимини топиш чоралари кўрилаётганини маълум қилди.
«Аслида муаммо нимада, хорижий инвесторни жалб этиш борасида ҳатто Президент жон куйдириб турганда МИБ ва солиқ идоралари ходимлари нимани ўйлаб бу ишларни бошлади экан? — деган савол кўтарилади мақолада. — Ваҳоланки, олдин бу ҳудудда фаолият юритган «Миконд»нинг 9 миллиард қарзи бўлиб, ер кичик саноат зонасига ўтгач, қарз ҳам унга мерос бўлиб қолган. Шунга қарамай Вазирлар Маҳкамасининг қарорига кўра, қарздорлик кечилган ва Тошкент шаҳар ҳокимлиги томонидан ўтказилган танлов асосида жойлар тадбиркорларга имтиёзли равишда 10 йиллик муддат билан ижарага берилган.
Айни вақтда эса солиқ идорасининг талабига кўра, МИБ томонидан хатлов ишлари олиб борилмоқда. Бундан эса тадбиркорлар азият чекмоқда. Инвесторлар эса кетиш кайфиятида.
Изоҳ (0)