Эски танишим, Беруний маҳалласида яшовчи иккинчи гуруҳ ногирони Умиджон Қодиров телефон қилиб қолди.
— Президентимизга мен ва менга ўхшаган ногиронлар номидан миннатдорчилигимизни матбуот орқали етказсангиз, — деди у ҳаяжонланиб. — «Дарё» сайтининг ўқувчилари кўп, шунга ёзинг, — яна қўшиб қўйди.
Умиджон анча йиллардан буён ногирон, ҳаракатлана олмайди. Шу куни Фарғона шаҳар 2-сектор штаби аъзолари прокурор М.Раҳмонов бошчилигида уларнинг хонадонига келиб ногиронлик аравачаси, дори-дармон совға қилиб кетишган экан.
2-сектор штаби ораста, дидли жиҳозланган. Мурожаатлар, унинг ижроси дафтарини кузатамиз. Шу куни штаб аъзолари Умиджонга ўхшаган Ҳувайдо, Навбаҳор, Меҳрибонлик, Ҳамкорлик каби яна бир неча МФЙларидаги эҳтиёжманд ногиронлар хонадонига ҳам ташриф буюриб аравачалар топширибдилар.
— Биз Ўзбекистон Республикаси Президентининг «Ҳудудларнинг жадал ижтимоий-иқтисодий ривожланишини таъминлашга доир устувор чора-тадбирлар тўғрисида»ги қарори асосида барча йўналишларда иш ташкил этдик, — дейди 2-сектор штаби аъзоси Жаҳонгир Исмоилов. Ҳудуддаги муаммоларни ҳар бир хонадонга кириб оилаларнинг турмуш тарзи билан танишгач аниқлаб олдик ва уни бартараф этиш «йўл харитаси»ни ишлаб чиқдик. Фаолиятимиз асосан ана шу режа асосида йўлга қўйилган.
Биз «йўл харитаси»даги ёзувлар манзили томон йўл олдик. Хўжамағиз, Ҳувайдо МФЙда яшовчи Ҳ.Ҳакимов, Н.Султоновлар эшитиш мосламаси совға қилганларидан, ўнта МФЙдаги кўп болали хонадон эгалари фарзандларига кийим-кечак тўпламлари совға қилинганидан, 40 та эҳтиёжманд оилаларга озиқ-овқат, беморларга дори-дармонлар тарқатилганидан миннатдорчилик билдириб, инсонпарвар сиёсат юритаётган давлатимиз раҳбари ва 2-сектор масъулларини дуо қилдилар.
— Савурбулоқ МФЙ марказдан четроқда жойлашган. Шунинг учунми, сектор раҳбари бизнинг маҳаллага тез-тез келиб туради, — дейди ёши улуғ Абдуғани ота. – Биз ижтимоий дорихона узоқда эканини айтгандик. Масала тез ҳал бўлди. Энди ҳафтада икки марта ижтимоий дорихонанинг ўзи кўчма фаолиятини йўлга қўйиб, шу ернинг ўзида керакли дори-дармонни оляпмиз.
— Маҳалламизда тўрт мингдан зиёд аҳоли яшайди, — дейди жўйдамлик Зухра опа Ҳамидова. – 23 та кам таъминланган оила фарзандларига автобус ташкил этиб «Ҳайвонот боғи»га саёҳат уюштирдилар. Менинг набирам ҳам бор эди улар орасида. Ўшанда оиламдаги энг қувончли кунлардан бири бўлди...
Фарғона шаҳридаги 2-секторда 18 та МФЙ, 22942 та хонадон, 74446 нафар ахоли бор. Уларнинг 14441 нафари вояга етмаганлар, 1045 нафари ногирон, 367 та эхтиёжманд оила, 24 та якка ёлғизлар мавжуд. Бу рақамлар ортидаги ҳар бир фуқаро, оила сектор аъзоларининг доимий эътибори, ғамхўрлигида. Муаммолар хам шунга яраша. Биргина Ҳувайдо маҳалласи ҳудудида 1300 метр ичимлик суви қувури, 10 км электр тармоқлари янгиланди. 14 та кам таъминланган оила уй жойлари таъмирланди. 1200 метр шиша толали кабел ётқизилиб, 1 км йўл асфальтланди, 85 та кўча чироқлари ўрнатилди. Ҳудуддаги эҳтиёждан келиб чиқиб, 230 ўринли хусусий боғча қуриб битказилди.
Ҳудуддаги бошқа маҳаллаларда ҳам шу каби ишлар қизғин олиб бориляпти.
Секторда яна бир ибратли тажриба йўлга қўйилган. Ҳар икки ҳафтада штабда «Тадбиркорлар куни» ўтказилади. Уларнинг муаммолари ўрганилиб ечим устида чоралар кўрилади.
— Аввалига амалдорлар уйма-уй юриб қолди, бу ҳам бир ўткинчи тадбир бўлса керак, деб ўйлагандим, — дейди Умиджон. – Йўқ, мен адашибман, бизга эътибор, ғамхўрлик изчил, доимий тус олди. Бу давлатимиз сиёсатига айланди. Биз шу сиёсатни ташкил этаётган, юритаётганлардан розимиз. Мухбир ака, шу гапларимни ҳам ёзинг!
Ўзбекистон Президенти Шавкат Мирзиёев ташаббуси билан барча соҳада олиб борилаётган ислоҳотлардан кўзланган мақсад ҳам аслида халқ розилигига эришиш эмасмиди?
Муҳаммаджон Обидов
Изоҳ (0)