Joriy yil fevral oyida Toshkent shahrida inkassator mashinasi va avtobus to‘qnashuvi natijasida avtobus haydovchisi halok bo‘lgandi. Mazkur ish yuzasidan tayyorlangan dastur Bosh prokuraturaning Facebook’ dagi sahifasi e’lon qilindi.
2018-yilning 15-fevral kuni soat 07:03 da Oloy bozoridan Universam bozori tomon harakatlangan 72-avtobus haydovchisi Yunusobod tumani, Amir Temur va Osiyo ko‘chalari chorrahasida sodir bo‘lgan yo‘l-transport hodisasi natijasida voqea joyida halok bo‘ldi.
Markaziy bankning Respublika inkassatsiya xizmati davlat unitar korxonasi inkassator-haydovchisi Ravshan Rasulov bu ishda aybdor deb topildi.
Yo‘l kameralari tomonidan qayd etilgan tasvirlarga e’tibor berilsa, maxsus inkassatsiya avtomashinalari Yo‘l patrul xizmati xodimlari hamrohligida kolonna bo‘lib Osiyo ko‘chasi bo‘ylab harakatlanib kelayotgan paytda patrul avtomashinasi svetoforning qizil chirog‘iga kirib, chorrahaning Oloy bozori tomonidan harakatlanib kelayotgan avtomashinalarga yo‘l bera boshlaydi. Uning ortidan kelayotgan Ravshan Rasulov boshqaruvidagi inkassatsiya yuk mashinasi qoidani qo‘pol ravishda buzib oldinga yuradi. Natijada avtobus bilan to‘qnashuv sodir bo‘ladi.
4 farzandning otasi bo‘lgan Mirfayoz Husanov voqea joyida halok bo‘lgandi. Jamoat transporti ichida bo‘lgan yana 8 nafar fuqaro turli darajadagi tan jarohatlarini oldi.
Mazkur holat bo‘yicha qo‘zg‘atilgan jinoyat ishi sudda ko‘rib chiqildi. Sud Rasulovga nisbatan 2,6 yil qamoq jazosi belgiladi.
Ma’lumot uchun, joriy yilning 6 oyi mobaynida respublikada 3774 ta YTH sodir etilgan. Buning oqibatida 943 kishi halok bo‘ldi, 3583 kishi jarohatlangan.
Izoh (0)