Жорий йил февраль ойида Тошкент шаҳрида инкассатор машинаси ва автобус тўқнашуви натижасида автобус ҳайдовчиси ҳалок бўлганди. Мазкур иш юзасидан тайёрланган дастур Бош прокуратуранинг Facebook’ даги саҳифаси эълон қилинди.
2018 йилнинг 15 февраль куни соат 07:03 да Олой бозоридан Универсам бозори томон ҳаракатланган 72-автобус ҳайдовчиси Юнусобод тумани, Амир Темур ва Осиё кўчалари чорраҳасида содир бўлган йўл-транспорт ҳодисаси натижасида воқеа жойида ҳалок бўлди.
Марказий банкнинг Республика инкассация хизмати давлат унитар корхонаси инкассатор-ҳайдовчиси Равшан Расулов бу ишда айбдор деб топилди.
Йўл камералари томонидан қайд этилган тасвирларга эътибор берилса, махсус инкассация автомашиналари Йўл патруль хизмати ходимлари ҳамроҳлигида колонна бўлиб Осиё кўчаси бўйлаб ҳаракатланиб келаётган пайтда патруль автомашинаси светофорнинг қизил чироғига кириб, чорраҳанинг Олой бозори томонидан ҳаракатланиб келаётган автомашиналарга йўл бера бошлайди. Унинг ортидан келаётган Равшан Расулов бошқарувидаги инкассация юк машинаси қоидани қўпол равишда бузиб олдинга юради. Натижада автобус билан тўқнашув содир бўлади.
4 фарзанднинг отаси бўлган Мирфаёз Ҳусанов воқеа жойида ҳалок бўлганди. Жамоат транспорти ичида бўлган яна 8 нафар фуқаро турли даражадаги тан жароҳатларини олди.
Мазкур ҳолат бўйича қўзғатилган жиноят иши судда кўриб чиқилди. Суд Расуловга нисбатан 2,6 йил қамоқ жазоси белгилади.
Маълумот учун, жорий йилнинг 6 ойи мобайнида республикада 3774 та ЙТҲ содир этилган. Бунинг оқибатида 943 киши ҳалок бўлди, 3583 киши жароҳатланган.
Изоҳ (0)