Toshkent shahar IIBB avtomobillar davlat raqam belgilarining noma’lum shaxs tomonidan o‘g‘irlanayotgani haqida xabar bergandi. IIBB matbuot xizmatidan ma’lum qilishlaricha, shaharning Mirzo Ulug‘bek tumani Chust va Buyuk Ipak yo‘li ko‘chalarida to‘xtab turgan avtomobillardan davlat raqamlari belgilarini yechib olgan huquqbuzar, bog‘lanish uchun Telegram’dagi kanal manzilini yozib qoldirgan.
Olib borilgan tezkor-qidiruv tadbiri natijasida huquqbuzarning shaxsini aniqlashga muvaffaq bo‘lindi. Bu 17 yoshli T.Yan bo‘lib chiqdi. Uning uyidan jabrlanuvchilardan biriga tegishli bo‘lgan avtomobilning davlat raqami belgisi va huquqbuzar foydalangan uyali telefon apparati topildi.
“Gumondorning qonuniy vakili guvohligida o‘tkazilgan tergov jarayonida T.Yan o‘z aybiga to‘liq iqror bo‘ldi”, — deyiladi IIBB axborotida.
Ayni paytda ushbu shaxsning shunga o‘xshash boshqa jinoiy holatlarga aloqadorligi o‘rganilmoqda. Shuningdek, IIBB matbuot xizmatining alohida qayd etishicha, surishtiruv davomida ushbu o‘smirning jinoyatga nega qo‘l urgani, uning sabab va omillariga aniqlik kiritiladi.
Izoh (0)