GM Uzbekistan avtomobillari narxi Davlat raqobat qo‘mitasining o‘rganishlaridan so‘ng oshiriladi

GM Uzbekistan avtomobillari uchun belgilangan yangi (oshgan) narxlar 1 avgustdan emas, balki bu narxlar Davlat raqobat qo‘mitasi tomonidan ko‘rib, o‘rganib chiqilganidan so‘ng kuchga kiradi. Bu haqda “O‘zavtosanoat” rahbari o‘rinbosari Umidjon Salimov “Kun.uz”ga bergan intervyusida ma’lum qilgan.

Qo‘mita narxlarning oshirilishi bilan bog‘liq holatni o‘rganib chiqadi. Bizda modellardagi opsiya (komplektatsiya)lar juda ko‘p. Ularning har birini qo‘mita mutaxassislari va bizning ekspertlar birgalikda ko‘rib chiqadi. Qo‘mitada mahsulotlar narxi qanchaga o‘zgartirilayotgani haqida so‘rash huquqi bor. Endi ular har bir model kesimida, opsiyalar kesimida narxlar necha foizga oshirilishi mo‘ljallanayotganini ko‘rib chiqishadi, so‘ng o‘z xulosalarini berishadi.

Hozir avtosalonlarga narxlarni oshirish bo‘yicha xat yuborilmagan. Barcha hisob-kitoblarimizni Raqobat qo‘mitasiga beryapmiz. Ular hisob-kitoblarni ko‘rib chiqib, so‘ng bizga narxlarni necha foizga oshirish mumkinligi yoki boshqacha belgilash haqida xulosa beradi. Shundan so‘ng, ularning tavsiyasi asosida, narxlar yana qaytadan hisoblab chiqiladi. Hozircha dilerlar shartnoma berishmayapti, to‘langan shartnomalarga mashinalar berilyapti.

Umidjon Salimov, “O‘zavtosanoat” rahbari o‘rinbosari