Dang‘arada xorijiy sayyohlarni o‘ldirgan jinoiy guruh a’zolari va buyurtmachi Tojikiston islom uyg‘onish partiyasiga mansub bo‘lgan va Eronda ta’lim olgan. Bu haqda Tojikiston IIV ma’lum qildi, deya xabar beradi “Asia-Plus”.
“Jinoiy guruhning qo‘lga olingan yetakchisi Husayn Abdusamadov 2014—2015-yillarda Eronda mafkuraviy va harbiy-diversion ta’lim olganini tasdiqladi. U yerda ‘Qori Nosir’ laqabli Nosirxo‘ja Ubaydov bilan tanishgan va IUP safiga kirgan”, — deyiladi vazirlik xabarida.
Mahkamaga ko‘ra, mazkur jinoyat buyurtmachisi ham 1992-yildan beri Tojikiston islom uyg‘onish partiyasi a’zosi bo‘lgan va 2015-yilda qidiruvga berilgan Nosirxo‘ja Ubaydovdir.
Vazirlik mazkur jinoyatni amalga oshirgan 4 kishi o‘ldirilgani va yana 4 kishi qo‘lga olinganini bildirdi.
Eslatib o‘tamiz, oldinroq IShID Tojikistonda xorijlik sayyohlar o‘ldirilishi uchun javobgarlikni zimmasiga olgandi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)