28-iyul kuni O‘zbekiston Qurolli Kuchlar akademiyasining ikki yillik Qo‘mondonlik-shtab fakulteti tinglovchilarining tantanali bitiruv marosimi bo‘lib o‘tdi. Bu haqda Mudofaa vazirligi matbuot xizmati “Daryo”ga ma’lum qildi.
1995-yilda tashkil etilgan va keyinchalik O‘zbekiston Prezidenti Shavkat Mirziyoyev tashabbusi bilan 2017-yilda oldingi Toshkent oliy umumqo‘shin qo‘mondonlik bilim yurtining shonli an’analarini saqlagan holda yangilangan Qurolli Kuchlar akademiyasi respublikadagi yetakchi oliy harbiy ta’lim muassasasi bo‘lib, oliy qo‘mondonlik tarkibidagi ofitserlarni tayyorlash va malakasini oshirish, shuningdek, mudofaa qurilishi sohasidagi ilmiy-amaliy tadqiqot va ishlanmalarni muvofiqlashtirish, mamlakatimizda harbiy ta’limni rivojlantirish kabi ustuvor vazifalarni amalga oshirib kelmoqda.
“Mamlakatimiz va butun mintaqa xavfsizligiga tahdidlar saqlanib turgan hozirgi sharoitda biz Qurolli Kuchlarimiz salohiyatini yanada mustahkamlash borasida boshlagan ishlarimizni izchil davom ettirishimiz kerak. Buning uchun sizlardan yangi imkoniyat va manbalarni izlab topish va ularni amaliyotga tatbiq etish talab etiladi”, — deydi mudofaa vaziri general-mayor Abdusalom Azizov bitiruvchilarni qutlash vaqtida.
Tantanada, shuningdek, Mudofaa vazirligi huzuridagi Jamoatchilik kengashi a’zolari, davlat va jamoat tashkilotlari vakillari, bitiruvchilarning yaqinlari ishtirok etdi.
Mudofaa vaziri bitiruvchilarga diplom va ko‘krak nishonlari tantanali topshirdi. 45 nafar bitiruvchidan 12 nafari qizil diplomga ega bo‘ldi.
Mazkur oliy harbiy ta’lim muassasasida to‘rt yil damovida ofitserlarni tayyorlaydigan umumqo‘shin fakulteti, strategik fikrlaydigan, intellektual saviyasi yetuk ofitser kadrlarni tayyorlash, milliy armiyamiz saflarini bugungi kun talablariga javob beradigan malakali mutaxassislarni ikki yil davomida tayyorlaydigan Qo‘mondonlik-shtab fakulteti hamda ofitser kadrlarning malakasini oshirish, ularni tayyorlash va qayta tayyorlash uchun bir necha oylik Malaka oshirish fakulteti faoliyat ko‘rsatmoqda.
Izoh (0)