28 июль куни Ўзбекистон Қуролли Кучлар академиясининг икки йиллик Қўмондонлик-штаб факультети тингловчиларининг тантанали битирув маросими бўлиб ўтди. Бу ҳақда Мудофаа вазирлиги матбуот хизмати «Дарё»га маълум қилди.
1995 йилда ташкил этилган ва кейинчалик Ўзбекистон Президенти Шавкат Мирзиёев ташаббуси билан 2017 йилда олдинги Тошкент олий умумқўшин қўмондонлик билим юртининг шонли анъаналарини сақлаган ҳолда янгиланган Қуролли Кучлар академияси республикадаги етакчи олий ҳарбий таълим муассасаси бўлиб, олий қўмондонлик таркибидаги офицерларни тайёрлаш ва малакасини ошириш, шунингдек, мудофаа қурилиши соҳасидаги илмий-амалий тадқиқот ва ишланмаларни мувофиқлаштириш, мамлакатимизда ҳарбий таълимни ривожлантириш каби устувор вазифаларни амалга ошириб келмоқда.
«Мамлакатимиз ва бутун минтақа хавфсизлигига таҳдидлар сақланиб турган ҳозирги шароитда биз Қуролли Кучларимиз салоҳиятини янада мустаҳкамлаш борасида бошлаган ишларимизни изчил давом эттиришимиз керак. Бунинг учун сизлардан янги имконият ва манбаларни излаб топиш ва уларни амалиётга татбиқ этиш талаб этилади», — дейди мудофаа вазири генерал-майор Абдусалом Азизов битирувчиларни қутлаш вақтида.
Тантанада, шунингдек, Мудофаа вазирлиги ҳузуридаги Жамоатчилик кенгаши аъзолари, давлат ва жамоат ташкилотлари вакиллари, битирувчиларнинг яқинлари иштирок этди.
Мудофаа вазири битирувчиларга диплом ва кўкрак нишонлари тантанали топширди. 45 нафар битирувчидан 12 нафари қизил дипломга эга бўлди.
Мазкур олий ҳарбий таълим муассасасида тўрт йил дамовида офицерларни тайёрлайдиган умумқўшин факультети, стратегик фикрлайдиган, интеллектуал савияси етук офицер кадрларни тайёрлаш, миллий армиямиз сафларини бугунги кун талабларига жавоб берадиган малакали мутахассисларни икки йил давомида тайёрлайдиган Қўмондонлик-штаб факультети ҳамда офицер кадрларнинг малакасини ошириш, уларни тайёрлаш ва қайта тайёрлаш учун бир неча ойлик Малака ошириш факультети фаолият кўрсатмоқда.
Изоҳ (0)