Toshkent shahridagi Mirzo Ulug‘bek istirohat bog‘ida Innovatsion rivojlanish vaziri Ibrohim Abdurahmonov hamda Toshkent shahrining Mirzo Ulug‘bek tumani hokimi Shavkatbek Ergashev tumandagi yoshlar bilan uchrashib, ularni qiynayotgan muammolarni tingladi, savollariga batafsil javob berdi. Bu haqda “Daryo”ga vazirlik matbuot xizmati ma’lum qildi.
Uchrashuvga nafaqat yoshlar, balki ularning ota-onalari ham kelib, farzandlariga doir muammolarni hal qilishlarini so‘radi. Ularni qiynayotgan masalalar asosan kollej, litseylarda, maktablarning yuqori sinflarida o‘qiydigan farzandlarini ishga joylashtirish, uy-joy bilan ta’minlash bo‘ldi. Shuningdek, yoshlarni harbiy xizmatga jo‘natish masalasi ham ko‘tarildi. Jumladan, bolasini uch yildan beri muddatli harbiy xizmatga jo‘natishga erisholmagan onaning murojaati yozib olinib, tez kunlarda o‘rganib chiqilishi aytildi.
Bundan tashqari, uchrashuvda tayyor dasturiy loyihalari bor yoshlar guruhi ham o‘z ishlanmalarini namoyish etdi. Ular vazirlikka taklif etilib, loyihani amalga oshirishda bevosita ko‘mak berilishiga kelishildi.
Uchrashuv samimiy, ochiq muloqot shaklida o‘tdi. Taniqli san’atkorlar, harbiy orkestr, bolalar sport seksiyalari qatnashchilarining chiqishlari tadbirga ko‘tarinki ruh bag‘ishladi.
Ta’kidlash joizki, Toshkent shahrining 11 tumanida tuman shtablari hamda umumlashtiruvchi shahar shtabi tashkil etilgan bo‘lib, ularga Innovatsion rivojlanish vazirligining mas’ul xodimlari biriktirilgan. Mazkur shtablarda tumanlardagi mutasaddi idora va korxonalar mas’ul xodimlari navbatchiligi tashkil etilgan bo‘lib, har kuni ertalab soat 8:00 dan kechki 22:00 ga qadar ular ishtirokida shtabga kelib tushayotgan murojaatlar o‘rganilib, tegishli tartibda hal etish ishlari amalga oshirilmoqda.
Har bir tumanda mahallalar sonidan kelib chiqib tegishli mutasaddi 1476 nafar xodimdan iborat 4 tadan 18 tagacha, jami 144 ta ishchi guruh faoliyat yuritmoqda.
20-iyul holatiga Toshkent shahridagi jami 494 ta mahalladan 72 tasi to‘liq o‘rganib chiqildi, qolgan mahallalarda o‘rganish ishlari davom etmoqda.
Mahalladagi o‘rganishlar natijasida jami 39308 ta xonadonga uyma-uy kirib chiqilgan bo‘lib, 1166 ta muammo aniqlangan.
Toshkent shahar bo‘yicha jami 47081 nafar yosh bilan muloqot qilingan bo‘lib, ularda 16651 yechimini kutayotgan muammolar borligi aniqlandi. Bundan 1123 tasi ijobiy hal etildi. 15528 murojaat o‘rganish jarayonida.
Izoh (0)