Тошкент шаҳридаги Мирзо Улуғбек истироҳат боғида Инновацион ривожланиш вазири Иброҳим Абдураҳмонов ҳамда Тошкент шаҳрининг Мирзо Улуғбек тумани ҳокими Шавкатбек Эргашев тумандаги ёшлар билан учрашиб, уларни қийнаётган муаммоларни тинглади, саволларига батафсил жавоб берди. Бу ҳақда «Дарё»га вазирлик матбуот хизмати маълум қилди.
Учрашувга нафақат ёшлар, балки уларнинг ота-оналари ҳам келиб, фарзандларига доир муаммоларни ҳал қилишларини сўради. Уларни қийнаётган масалалар асосан коллеж, лицейларда, мактабларнинг юқори синфларида ўқийдиган фарзандларини ишга жойлаштириш, уй-жой билан таъминлаш бўлди. Шунингдек, ёшларни ҳарбий хизматга жўнатиш масаласи ҳам кўтарилди. Жумладан, боласини уч йилдан бери муддатли ҳарбий хизматга жўнатишга эришолмаган онанинг мурожаати ёзиб олиниб, тез кунларда ўрганиб чиқилиши айтилди.
Бундан ташқари, учрашувда тайёр дастурий лойиҳалари бор ёшлар гуруҳи ҳам ўз ишланмаларини намойиш этди. Улар вазирликка таклиф этилиб, лойиҳани амалга оширишда бевосита кўмак берилишига келишилди.
Учрашув самимий, очиқ мулоқот шаклида ўтди. Таниқли санъаткорлар, ҳарбий оркестр, болалар спорт секциялари қатнашчиларининг чиқишлари тадбирга кўтаринки руҳ бағишлади.
Таъкидлаш жоизки, Тошкент шаҳрининг 11 туманида туман штаблари ҳамда умумлаштирувчи шаҳар штаби ташкил этилган бўлиб, уларга Инновацион ривожланиш вазирлигининг масъул ходимлари бириктирилган. Мазкур штабларда туманлардаги мутасадди идора ва корхоналар масъул ходимлари навбатчилиги ташкил этилган бўлиб, ҳар куни эрталаб соат 8:00 дан кечки 22:00 га қадар улар иштирокида штабга келиб тушаётган мурожаатлар ўрганилиб, тегишли тартибда ҳал этиш ишлари амалга оширилмоқда.
Ҳар бир туманда маҳаллалар сонидан келиб чиқиб тегишли мутасадди 1476 нафар ходимдан иборат 4 тадан 18 тагача, жами 144 та ишчи гуруҳ фаолият юритмоқда.
20 июль ҳолатига Тошкент шаҳридаги жами 494 та маҳалладан 72 таси тўлиқ ўрганиб чиқилди, қолган маҳаллаларда ўрганиш ишлари давом этмоқда.
Маҳалладаги ўрганишлар натижасида жами 39308 та хонадонга уйма-уй кириб чиқилган бўлиб, 1166 та муаммо аниқланган.
Тошкент шаҳар бўйича жами 47081 нафар ёш билан мулоқот қилинган бўлиб, уларда 16651 ечимини кутаётган муаммо борлиги аниқланди. Бундан 1123 таси ижобий ҳал этилди. 15528 мурожаат ўрганиш жараёнида.
Изоҳ (0)