Jinoyat ishlari bo‘yicha Chiroqchi tuman sudida to‘rt marta jinoyat sodir etgan 18 yoshli yigitga nisbatan hukm o‘qildi. Bu haqda “Daryo”ga Jinoyat ishlari bo‘yicha Chiroqchi tuman sudi matbuot xizmati xabar bermoqda.
“R.E dastlab 15 yoshida o‘g‘irlik jinoyatini sodir qilganligi uchun shartli hukm qo‘llanilib, jamoatchilik nazoratiga topshirladi. Biroq, R.E bundan xulosa chiqarmadi va oradan yarim yil o‘tmasdan takroran o‘g‘irlik jinoyatini sodir qiladi. Ammo bu safar ham uning voyaga yetmaganligi inobatga olinib, shartli ravishda ozodlikdan mahrum qilinib, sinov muddati belgilanadi. R.E esa unga berilayotgan imkoniyatni “imtiyoz” deb qabul qilib, o‘g‘irlik qilishni davom ettiradi. Bu safar unga ozodlikdan mahrum qilish jazosi tayinlanib, jazoni tarbiya koloniyalarda o‘tash belgilanadi. Ya’ni bu orqali o‘z qilmishi oqibatini tushunib yetishi uchun umid bog‘landi. Jazoni o‘tash vaqtida insonparvarlik tamoyili qo‘llanib, o‘talmay qolgan jazosi yengilroq jazoga almashtiriladi, tuzalish yo‘liga o‘tishi uchun yana bir bor imkoniyat beriladi. Ammo bunday bo‘lib chiqmadi. R.E ozodlikka chiqqach jazoni o‘tashdan bo‘yin tovlab, yana bir yigitni o‘g‘irlikka jalb qildi”, — deyiladi xabarda.
R.E Chiroqchi tumanidagi dehqon bozoridagi savdo do‘konlaridan biridan sherigi sotuvchilarni chalg‘itib turishidan foydalanib savdo pullarini yashirin ravishda o‘g‘irlagan. Uning bu galgi qilmishi ichki ishlari xodimlari tomonidan o‘z vaqtida aniqlandi.
Jinoyat ishlari bo‘yicha Chiroqchi tuman sudi tomonidan R.E.ga oid jinoyat ishi sayyor sud majlisida, bevosita qishloqdoshlari va keng jamoatchilik ishtirokida ko‘rib chiqildi. Ishdagi barcha holatlar inobatga olinib, yengil jazo tayinlash orqali uni tarbiyalash imkoni yo‘q deb topilib, O‘zbekiston Respublikasi Jinoyat Kodeksi 169-moddasi 3-qismi (o‘g‘rilik) “a” bandi bilan aybli topildi va o‘talmay qolgan jazo muddati Jinoyat Kodeksi 60-moddasi (Bir necha hukm yuzasidan jazo tayinlash) tartibida qisman qo‘shilib 5 yil-u 6 oy muddatga ozodlikdan mahrum qilindi, uning sherigi N.Yu.ga esa birinchi marta jinoyat sodir qilganligi, mahalla fuqarolar yig‘ini iltimosnomasi inobatga olinib, 3 yil muddatga ozodlikdan mahrum qilish jazosi tayinlandi.
Izoh (0)