Жиноят ишлари бўйича Чироқчи туман судида тўрт марта жиноят содир этган 18 ёшли йигитга нисбатан ҳукм ўқилди. Бу ҳақда «Дарё»га Жиноят ишлари бўйича Чироқчи туман суди матбуот хизмати хабар бермоқда.
«Р.Э дастлаб 15 ёшида ўғирлик жиноятини содир қилганлиги учун шартли ҳукм қўлланилиб, жамоатчилик назоратига топширлади. Бироқ, Р.Э бундан хулоса чиқармади ва орадан ярим йил ўтмасдан такроран ўғирлик жиноятини содир қилади. Аммо бу сафар ҳам унинг вояга етмаганлиги инобатга олиниб, шартли равишда озодликдан маҳрум қилиниб, синов муддати белгиланади. Р.Э эса унга берилаётган имкониятни «имтиёз» деб қабул қилиб, ўғирлик қилишни давом эттиради. Бу сафар унга озодликдан маҳрум қилиш жазоси тайинланиб, жазони тарбия колонияларда ўташ белгиланади. Яъни бу орқали ўз қилмиши оқибатини тушуниб етиши учун умид боғланди. Жазони ўташ вақтида инсонпарварлик тамойили қўлланиб, ўталмай қолган жазоси енгилроқ жазога алмаштирилади, тузалиш йўлига ўтиши учун яна бир бор имконият берилади. Аммо бундай бўлиб чиқмади. Р.Э озодликка чиққач жазони ўташдан бўйин товлаб, яна бир йигитни ўғирликка жалб қилди», — дейилади хабарда.
Р.Э Чироқчи туманидаги деҳқон бозоридаги савдо дўконларидан биридан шериги сотувчиларни чалғитиб туришидан фойдаланиб савдо пулларини яширин равишда ўғирлаган. Унинг бу галги қилмиши ички ишлари ходимлари томонидан ўз вақтида аниқланди.
Жиноят ишлари бўйича Чироқчи туман суди томонидан Р.Э.га оид жиноят иши сайёр суд мажлисида, бевосита қишлоқдошлари ва кенг жамоатчилик иштирокида кўриб чиқилди. Ишдаги барча ҳолатлар инобатга олиниб, енгил жазо тайинлаш орқали уни тарбиялаш имкони йўқ деб топилиб, Ўзбекистон Республикаси Жиноят Кодекси 169-моддаси 3-қисми (ўғрилик) «а» банди билан айбли топилди ва ўталмай қолган жазо муддати Жиноят Кодекси 60-моддаси (Бир неча ҳукм юзасидан жазо тайинлаш) тартибида қисман қўшилиб 5 йил-у 6 ой муддатга озодликдан маҳрум қилинди, унинг шериги Н.Ю.га эса биринчи марта жиноят содир қилганлиги, маҳалла фуқаролар йиғини илтимосномаси инобатга олиниб, 3 йил муддатга озодликдан маҳрум қилиш жазоси тайинланди.
Изоҳ (0)