Farg‘ona viloyati hokimi Shuhrat G‘aniyev boshchiligidagi delegatsiyasi Xitoy xalq respublikasida bo‘ldi. Bu haqda “Daryo” muxbiri Azizjon Ermatov xabar bermoqda.
Delegatsiya tarkibidan Qo‘qon va Marg‘ilon shaharlari hokimlari va ularning investitsiya masalalari bo‘yicha o‘rinbosarlari, soha bo‘yicha mutaxassislar hamda bir guruh tadbirkorlar o‘rin oldi.
Dastlab delegatsiya a’zolari Xitoyning qurilish mahsulotlari ishlab chiqarish va loyihalash bo‘yicha yetakchi davlat korxonalaridan biri bo‘lgan China Building Material Academy’ga tashrif buyurib, kompaniyaning tarixi, qo‘lga kiritgan yutuqlari va kelajakdagi rejalari bilan yaqindan tanishdi.
Beijing Truimph International Engineering Co. Ltd kompaniyasi bosh ofisida o‘tkazilgan muzokaralar natijasida O‘zbekiston tumanida sement va gipsokarton ishlab chiqaradigan qo‘shma korxona barpo etish bo‘yicha memorandum imzolandi. Shuningdek, Beijing Truimph International Engineering Co. Ltd kompaniyasi bilan qurilish mollari ishlab chiqarishga ixtisoslashgan qo‘shma korxonalar barpo etish bo‘yicha kelishuvga erishildi. Kompaniya tomonidan ikki tomonlama savdo aylanmasini oshirish maqsadida Qo‘qon shahrida mahsulotlar ombori va logistika markazi barpo etish istagi bildirildi. Ushbu taklif Farg‘ona viloyati hokimligi tomonidan ma’qullandi.
Delegatsiya vakillari O‘zbekistonning Xitoydagi favqulodda va muxtor elchisi B.Saidov hamrohligida Xubey provinsiyasining Uxan shahriga tashrif buyurdi. Qurilish va avtomobil sanoati uchun po‘lat rulonlar ishlab chiqaruvchi eng yirik kompaniya hisoblangan Shina Baowu Steel Iron Company’ning ishlab chiqarish jarayoni bilan tanishdi.
Shundan so‘ng, China Maneco Co. Ltd farmatsevtika kompaniyasi bilan muzokaralar o‘tkazildi. Kompaniya rahbariyatiga Farg‘ona viloyatida tabletkalar, suspenziyalar, inyeksiyalar ishlab chiqarishga ixtisoslashgan korxona tashkil etish bo‘yicha taklif berildi. Kompaniya rahbariyati bilan yaqin oylar ichida Farg‘ona viloyatida o‘zaro hamkorlik bo‘yicha qo‘shimcha muzokaralar olib borishga kelishib olindi.
Xitoyga safarning ikkinchi kunida Westin mehmonxonasida delegatsiya a’zolari hamda Uxan shahri hokimligi, savdo-sanoat palatasi va Xubey provinsiyasining 50 nafardan ortiq tadbirkorlari ishtirokida biznes-forum tashkil etildi.
Delegatsiya a’zolari Uxan shahri meri Chjou Syanvan tomonidan rasmiy qabul qilindi. Farg‘ona viloyati bilan iqtisodiy, ijtimoiy, madaniy sohalarda hamkorlikni yo‘lga qo‘yish masalalari ko‘rib chiqildi. Uxan shahri hokimligi delegatsiyasi joriy yilning sentabr oyida Farg‘onaga tashrif buyuradigan bo‘ldi.
Xubey provinsiyasi gubernatori Van Syaodun tomonidan o‘tkazilgan rasmiy qabulda Shanxi Zhongya Building Material Co. Ltd kompaniyasi bilan Beshariq tumanida ishga tushirilishi rejalashtirilayotgan Farg’ona Yasin qurilish mollari qo‘shma korxonasining sement ishlab chiqarish quvvatini kengaytirish borasida muzokaralar olib borildi. Muzokaralar so‘ngida tomonlar kelishuv memorandumini imzoladi.
Delegatsiya a’zolari Wuhan Asia-Europe Logistics Co. Ltd kompaniyasiga ham tashrif buyurdi. Ushbu kompaniya Yevropa va Rossiya mamlakatlariga yuk yetkazib berishga ixtisoslashgan Xubey provinsiyasidagi eng yirik davlat logistika markazi hisoblanadi. Ushbu kompaniya Xubey–Xorgas–Andijon temir yo‘li qatnovini yo‘lga qo‘ygan. Kompaniya vakillariga Farg‘ona viloyatida logistika markazini tashkil etish hamda qishloq xo‘jalik mahsulotlarini import qilish bo‘yicha hamkorlik taklif etildi. Joriy yilning sentabr oyida ushbu kompaniya vakillari ham Farg‘ona viloyatiga tashrif buyuradi.
Farg‘ona viloyati delegatsiyasining Shandon provinsiyasining Zibo shahriga tashrifi davomida ham bir qator yangi loyihalar bo‘yicha memorandumlar imzolandi. Jumladan, Farg‘ona shahridagi Modern Ceramiks Industries mas’uliyati cheklangan jamiyati va Zibo Herui China korxonasining oltingugurtni qayta ishlash orqali sulfar polimer ishlab chiqarish, WMB Chemical Co. Ltd kompaniyasining sulfar uglerod ishlab chiqarish loyihalari hamkorlikda amalga oshiriladigan bo‘ldi. Great Wall Ceramics Co. Ltd va ZRSC Technology Co. Ltd o‘rtasida o‘tga chidamli g‘isht ishlab chiqaradigan qo‘shma korxona tashkil etish, Farg‘ona viloyatida faoliyat ko‘rsatayotgan Starke Uzbekistan qo‘shma korxonasi negizida forfor chinni idishlar ishlab chiqarish loyihasini amalga oshirish bo‘yicha kelishuvlarga erishildi. Shaffof Omadli Sanoat va The Urumqi Silk Road Power Trading Co. Ltd korxonalari o‘rtasida olib borilgan muzokaralar natijasida tomonlar siqilgan gaz uchun ballonlar hamda ular uchun butlovchi qismlar ishlab chiqarish bo‘yicha ham memorandum imzoladi.
Delegatsiya vakillari bugun o‘z safarlarini yakunlashadi. Xitoy safari davomida imzolangan hujjatlar asosida Farg‘ona viloyatiga katta miqdorda xorijiy investitsiya jalb etilishi kutilmoqda.
Izoh (0)