Фарғона вилояти ҳокими Шуҳрат Ғаниев бошчилигидаги делегацияси Хитой халқ республикасида бўлди. Бу ҳақда «Дарё» мухбири Азизжон Эрматов хабар бермоқда.
Делегация таркибидан Қўқон ва Марғилон шаҳарлари ҳокимлари ва уларнинг инвестиция масалалари бўйича ўринбосарлари, соҳа бўйича мутахассислар ҳамда бир гуруҳ тадбиркорлар ўрин олди.
Дастлаб делегация аъзолари Хитойнинг қурилиш маҳсулотлари ишлаб чиқариш ва лойиҳалаш бўйича етакчи давлат корхоналаридан бири бўлган China Building Material Academy’га ташриф буюриб, компаниянинг тарихи, қўлга киритган ютуқлари ва келажакдаги режалари билан яқиндан танишди.
Beijing Truimph International Engineering Co. Ltd компанияси бош офисида ўтказилган музокаралар натижасида Ўзбекистон туманида цемент ва гипсокартон ишлаб чиқарадиган қўшма корхона барпо этиш бўйича меморандум имзоланди. Шунингдек, Beijing Truimph International Engineering Co. Ltd компанияси билан қурилиш моллари ишлаб чиқаришга ихтисослашган қўшма корхоналар барпо этиш бўйича келишувга эришилди. Компания томонидан икки томонлама савдо айланмасини ошириш мақсадида Қўқон шаҳрида маҳсулотлар омбори ва логистика маркази барпо этиш истаги билдирилди. Ушбу таклиф Фарғона вилояти ҳокимлиги томонидан маъқулланди.
Делегация вакиллари Ўзбекистоннинг Хитойдаги фавқулодда ва мухтор элчиси Б.Саидов ҳамроҳлигида Хубэй провинциясининг Ухань шаҳрига ташриф буюрди. Қурилиш ва автомобиль саноати учун пўлат рулонлар ишлаб чиқарувчи энг йирик компания ҳисобланган Shina Baowu Steel Iron Company’нинг ишлаб чиқариш жараёни билан танишди.
Шундан сўнг, China Maneco Co. Ltd фармацевтика компанияси билан музокаралар ўтказилди. Компания раҳбариятига Фарғона вилоятида таблеткалар, суспензиялар, инъекциялар ишлаб чиқаришга ихтисослашган корхона ташкил этиш бўйича таклиф берилди. Компания раҳбарияти билан яқин ойлар ичида Фарғона вилоятида ўзаро ҳамкорлик бўйича қўшимча музокаралар олиб боришга келишиб олинди.
Хитойга сафарнинг иккинчи кунида Westin меҳмонхонасида делегация аъзолари ҳамда Ухань шаҳри ҳокимлиги, савдо-саноат палатаси ва Хубэй провинциясининг 50 нафардан ортиқ тадбиркорлари иштирокида бизнес-форум ташкил этилди.
Делегация аъзолари Ухань шаҳри мэри Чжоу Цяньван томонидан расмий қабул қилинди. Фарғона вилояти билан иқтисодий, ижтимоий, маданий соҳаларда ҳамкорликни йўлга қўйиш масалалари кўриб чиқилди. Ухань шаҳри ҳокимлиги делегацияси жорий йилнинг сентябрь ойида Фарғонага ташриф буюрадиган бўлди.
Хубэй провинцияси губернатори Ван Цяодун томонидан ўтказилган расмий қабулда Shanxi Zhongya Building Material Co. Ltd компанияси билан Бешариқ туманида ишга туширилиши режалаштирилаётган Фарғона Yasin қурилиш моллари қўшма корхонасининг цемент ишлаб чиқариш қувватини кенгайтириш борасида музокаралар олиб борилди. Музокаралар сўнгида томонлар келишув меморандумини имзолади.
Делегация аъзолари Wuhan Asia-Europe Logistics Co. Ltd компаниясига ҳам ташриф буюрди. Ушбу компания Европа ва Россия мамлакатларига юк етказиб беришга ихтисослашган Хубэй провинциясидаги энг йирик давлат логистика маркази ҳисобланади. Ушбу компания Хубэй–Хоргас–Андижон темир йўли қатновини йўлга қўйган. Компания вакилларига Фарғона вилоятида логистика марказини ташкил этиш ҳамда қишлоқ хўжалик маҳсулотларини импорт қилиш бўйича ҳамкорлик таклиф этилди. Жорий йилнинг сентябрь ойида ушбу компания вакиллари ҳам Фарғона вилоятига ташриф буюради.
Фарғона вилояти делегациясининг Шаньдун провинциясининг Зибо шаҳрига ташрифи давомида ҳам бир қатор янги лойиҳалар бўйича меморандумлар имзоланди. Жумладан, Фарғона шаҳридаги Modern Ceramiks Industries масъулияти чекланган жамияти ва Зибо Herui China корхонасининг олтингугуртни қайта ишлаш орқали сулфар полимер ишлаб чиқариш, WMB Chemical Co. Ltd компаниясининг сулфар углерод ишлаб чиқариш лойиҳалари ҳамкорликда амалга ошириладиган бўлди. Great Wall Ceramics Co. Ltd ва ZRSC Technology Co. Ltd ўртасида ўтга чидамли ғишт ишлаб чиқарадиган қўшма корхона ташкил этиш, Фарғона вилоятида фаолият кўрсатаётган Starke Uzbekistan қўшма корхонаси негизида форфор чинни идишлар ишлаб чиқариш лойиҳасини амалга ошириш бўйича келишувларга эришилди. Шаффоф Омадли Саноат ва The Urumqi Silk Road Power Trading Co. Ltd корхоналари ўртасида олиб борилган музокаралар натижасида томонлар сиқилган газ учун баллонлар ҳамда улар учун бутловчи қисмлар ишлаб чиқариш бўйича ҳам меморандум имзолади.
Делегация вакиллари бугун ўз сафарларини якунлашади. Хитой сафари давомида имзоланган ҳужжатлар асосида Фарғона вилоятига катта миқдорда хорижий инвестиция жалб этилиши кутилмоқда.
Изоҳ (0)