28 yoshli Sardor M. 46 yoshli Marat U. bilan Sergeli tumanidagi avtomobil bozorida birga ishlardi. Biri ehtiyot qismlar sotish bilan shug‘ullangan bo‘lsa, ikkinchisi chilangarlik qilardi. Ammo oxirgi paytlarda Maratning boshqa “qirralari” ham namoyon bo‘la boshladi, u yolg‘onga aralashib qoldi. Bu haqda IIBB matbuot xizmati xabar bermoqda.
Shu yilning 18-iyun kuni Zangiota tumanida yashovchi Marat qo‘ng‘iroq qilib olish uchun Sardordan telefonini berib turishini so‘raydi. Tabiiyki, Sardor ikkilanmay telefonni unga beradi. Vaziyatdan foydalangan Marat telefonni olib, ko‘zdan g‘oyib bo‘ladi.
Narxi 4 million 800 ming so‘m bo‘lgan telefon bilan birga iPhone g‘ilofi ichiga solib qo‘ygan 300 dollardan ham mahrum bo‘lgan Sardor Maratning telefonini qaytarib berishini kutadi, biroq uning firibiga aldangan bozorda birgina u emasligini bilgach, Sergeli tuman IIO FMBga ariza bilan murojaat qildi.
Holat yuzasidan Jinoyat kodeksining 168-moddasi (“Firibgarlik”) bilan jinoyat ishi qo‘zg‘atildi. 14- iyul kuni Marat qo‘lga olindi. Olib borilayotgan tergov ishida gumondorning shunga o‘xshash boshqa firibgarlik harakatlari ham fosh etilmoqda.
Ichki ishlar xodimlarining tavsiyalariga ko‘ra, agarda kimdir telefoningizdan foydalanishni iltimos qilsa, uning nomidan qo‘ng‘iroq qilgan yoki qo‘lda tutgan holda baland ovozda o‘zaro gaplashish imkoniyatini yaratib bergan ma’qul. Agar unga haqiqatdan ham qo‘ng‘iroq zarur bo‘lsa, taklifingizga ko‘nadi. “Tanishimga ishonmaslikka xijolat qilaman, noqulay”, deydigan bo‘lsangiz, unda telefondan foydalanayotganda uning yonidan uzoqlashmaganingiz ma’qul.
Izoh (0)