Farg‘ona viloyati Toshloq tumanining Besholish dahasida joylashgan dala hovlidagi jimjitlikni ikki kishining kulgisi buzadi. Bu haqda O‘zA hikoya qilmoqda.
Irodaning uyali telefoni jiringlayvergach, "oshiq-ma’shuq"larning xayoli bo‘lindi. Qo‘ng‘iroq egasi ayolning ilgarigi tanishlaridan biri Nozim ekan.
Telefondagi bir-ikki daqiqalik suhbat ko‘p o‘tmay jiddiy tus oldi. Bunga Irodaning yonida turgan erkakning ovozi sabab bo‘ldi.
— Yoningdagi kim? — deb so‘radi Nozim ayoldan.
Iroda savoldan shoshib qoldi shekilli qo‘l telefonidagi aloqani darrov o‘chirdi. Nozimga eshitilgan ovoz Rustam Yusupovga tegishli edi. Ilgaridan uni tanigan Nozim telefondagi ismlar ro‘yxatidan Rustamning raqamini topdi. Bu galgi qo‘ng‘iroq erkaklar orasidagi tortishuvga aylanib ketdi. Kurakda turmaydigan haqorat so‘zlari yangradi.
—Hozir qayerdasan? — dag‘dag‘a qildi Rustam uning manzilini so‘rarkan.
— Sen o‘zing qayerdasan, — deb jahl otiga mindi Nozim ham bo‘sh kelmay.
– Bu yerlarni topa olmaysan, kutib tur, men o‘zim sening yoningga boraman!
Ko‘p o‘tmay Nozimning Farg‘ona shahridagi yashash manziliga Lacetti mashinasi yetib keldi. Undan birin-ketin tushib kelgan “ko‘cha xo‘jayinlari”, Rustamning hamtovoqlari Doston Azimov, Mansur Mo‘minov va Farhod Millaboyev edi. Rustamdan uni olib kelish haqida tegishli ko‘rsatma olgan korchalonlar Nozimning mahallasida “hunarlari”ni ko‘rsatdi, uni do‘pposladi. Bu bilan qanoatlanmagan bezorilar Nozimni mashina yukxonasiga majburlab “joylab”, Besholishdagi dala hovliga yo‘l oladi. Bu holatlarning barchasi shu hududda joylashgan do‘kondagi kuzatuv kamerasiga muhrlanib qoldi.
Rustamning topshirig‘i yakuniga yetganida dala hovlini allaqanday bezovtalik qopladi. Rustam qarshisidagi raqibidan nimaga haqorat qilganining so‘rog‘ini olib boravergach, Nozim G‘ofurov hushini yo‘qotayozdi. Nozimning qat’iyati uning g‘azabini battar qo‘zg‘adi. Oshxona pichog‘ini olib chiqib Nozimning bo‘g‘ziga tirab, hatto o‘ldirib yuborish bilan qo‘rqitdi. O‘lib ketsa ishlar bir yilga qolmay bosti-bosti bo‘lib ketishini mag‘rurlik bilan ta’kidlar chog‘i Rustamning qo‘lidagi sovuq qurol Nozimning bo‘ynini tilib yubordi.
Nozim yengilishga majbur bo‘ldi. Zotan, uning ro‘parasida har qanday yovuzlikka tayyor jinoiy guruh shay bo‘lib turardi. Yosh umriga bir zumda hukm o‘qilishidan cho‘chib, ularning talablarini bajarishdan qaytmadi. Dala hovlidan qaytarkan Nozim kasalxonaga borgach, yiqilib shu ahvolga tushganini aytishi zarur edi. Rustamning bu tayinlov gapi jinoiy ish ochilmasligi uchun edi.
Sud-tibbiy ekspertizasining 2017-yil 18-dekabrdagi xulosasiga ko‘ra, N.G‘ofurovda o‘sha kungi olishuvlardan keyin bosh ensa sohasida lat yegan yara, chap va o‘ng chakka sohalaridagi yumshoq to‘qimalarning lat yeyishi, ikki quloq supralari va ortidagi qontalash va yana shu kabi bir qator shikastlanishlar vujudga kelgan edi. Sudlanuvchilar va guvohlarning ko‘rsatmalari, ashyoviy dalillar, shuningdek, kuzatuv kamerasidagi tasvirlar tufayli oldindan til biriktirgan jinoiy guruh qilmishlari o‘z isbotini topdi.
Sudlanuvchilar kelishilgan holda odam o‘g‘irlash, jamiyatda o‘rnatilgan yurish-turish qoidalarini mensimagan holda urish-do‘pposlash jinoyatlarini qasddan sodir etgan. Jinoyat ishlari bo‘yicha Qo‘shtepa tuman sudi Rustam Yusupovni 6 yilu 6 oy muddatga, Doston Azimov hamda Mansur Mo‘minovni 5 yilu 6 oy muddatga, Farhod Millaboyevni 5 yilu 1 oy muddatga ozodlikdan mahrum qilish to‘g‘risida hukm chiqardi.
Izoh (0)