O‘zbekiston mudofaa vaziri general-mayor Abdusalom Azizov boshchiligidagi harbiy delegatsiyasining Qozog‘istonga rasmiy tashrifi doirasida ikki mamlakat maxsus operatsiya kuchlari bo‘linmalarining “Yerik dala” hamkorlikdagi maxsus-taktik o‘quv mashg‘uloti o‘tkazildi. Bu haqda vazirlik matbuot xizmati xabar berdi.
O‘quv mashg‘ulotlari jarayonida Qozog‘iston va O‘zbekiston maxsus operatsiya kuchlari bo‘linmalari tomonidan tunggi vaqtda o‘quv-jangovar razvedka harakatlari amalga oshirildi. Uchuvchisiz uchish apparati kompleksi yordamida o‘tkazilgan havo razvedkasi davomida 2500 metr balandlikdan shartli noqonuniy qurollangan guruh aniqlanib, bir juft Su-30 SM yordamida yo‘q qilindi. Shartli dushmanning ehtimoliy harakat marshruti yo‘nalishida 2000 metr balandlikdan maqsadli hujum uyushtirildi. Zarbalar, shuningdek, aviatsiya yordamida ham o‘tkazildi.
Reaktiv va stvolli artilleriyalar noqonuniy qurolli guruhlarni uchuvchisiz boshqariladigan uchish qurilmalari hamda yerdagi elektro-optik razvedka vositalari yordamida aniqlab ularga o‘t ochdi.
O‘zbekiston va Qozog‘iston maxsus operatsiya kuchlari bo‘linmalari hamkorligidagi mashg‘ulotning birinchi bosqichida ko‘zlangan maqsadga erishildi. O‘quv mashg‘ulotning ikkinchi bosqichi O‘zbekiston Markaziy harbiy okrugidagi “Forish” tog‘ dala o‘quv markazi bazasida o‘tkazilishi rejalashtirilgan.
O‘zbekiston mudofaa vaziri general-mayor Abdusalom Azizov Qozog‘iston mudofaa vaziriga iliq qabul uchun minnatdorchilik bildirdi va hamkorlikdagi mashg‘ulotlarni muntazam tashkillashtirib turish ikki mamlakat armiyasining rivojida ahamiyatli bo‘lishini ta’kidladi.
Izoh (0)