28 ёшли Сардор М. 46 ёшли Марат У. билан Сергели туманидаги автомобиль бозорида бирга ишларди. Бири эҳтиёт қисмлар сотиш билан шуғулланган бўлса, иккинчиси чилангарлик қиларди. Аммо охирги пайтларда Маратнинг бошқа «қирралари» ҳам намоён бўла бошлади, у ёлғонга аралашиб қолди. Бу ҳақда ИИББ матбуот хизмати хабар бермоқда.
Шу йилнинг 18 июнь куни Зангиота туманида яшовчи Марат қўнғироқ қилиб олиш учун Сардордан телефонини бериб туришини сўрайди. Табиийки, Сардор иккиланмай телефонни унга беради. Вазиятдан фойдаланган Марат телефонни олиб, кўздан ғойиб бўлади.
Нархи 4 миллион 800 минг сўм бўлган телефон билан бирга iPhone ғилофи ичига солиб қўйган 300 доллардан ҳам маҳрум бўлган Сардор Маратнинг телефонини қайтариб беришини кутади, бироқ унинг фирибига алданган бозорда биргина у эмаслигини билгач, Сергели туман ИИО ФМБга ариза билан мурожаат қилди.
Ҳолат юзасидан Жиноят кодексининг 168-моддаси («Фирибгарлик») билан жиноят иши қўзғатилди. 14- июль куни Марат қўлга олинди. Олиб борилаётган тергов ишида гумондорнинг шунга ўхшаш бошқа фирибгарлик ҳаракатлари ҳам фош этилмоқда.
Ички ишлар ходимларининг тавсияларига кўра, агарда кимдир телефонингиздан фойдаланишни илтимос қилса, унинг номидан қўнғироқ қилган ёки қўлда тутган ҳолда баланд овозда ўзаро гаплашиш имкониятини яратиб берган маъқул. Агар унга ҳақиқатдан ҳам қўнғироқ зарур бўлса, таклифингизга кўнади. «Танишимга ишонмасликка хижолат қиламан, ноқулай», дейдиган бўлсангиз, унда телефондан фойдаланаётганда унинг ёнидан узоқлашмаганингиз маъқул.
Изоҳ (0)