Ўзбекистон мудофаа вазири генерал-майор Абдусалом Азизов бошчилигидаги ҳарбий делегациясининг Қозоғистонга расмий ташрифи доирасида икки мамлакат махсус операция кучлари бўлинмаларининг «Ерик дала» ҳамкорликдаги махсус-тактик ўқув машғулоти ўтказилди. Бу ҳақда вазирлик матбуот хизмати хабар берди.
Ўқув машғулотлари жараёнида Қозоғистон ва Ўзбекистон махсус операция кучлари бўлинмалари томонидан тунгги вақтда ўқув-жанговар разведка ҳаракатлари амалга оширилди. Учувчисиз учиш аппарати комплекси ёрдамида ўтказилган ҳаво разведкаси давомида 2500 метр баландликдан шартли ноқонуний қуролланган гуруҳ аниқланиб, бир жуфт Су-30 СМ ёрдамида йўқ қилинди. Шартли душманнинг эҳтимолий ҳаракат маршрути йўналишида 2000 метр баландликдан мақсадли ҳужум уюштирилди. Зарбалар, шунингдек, авиация ёрдамида ҳам ўтказилди.
Реактив ва стволли артиллериялар ноқонуний қуролли гуруҳларни учувчисиз бошқариладиган учиш қурилмалари ҳамда ердаги электро-оптик разведка воситалари ёрдамида аниқлаб уларга ўт очди.
Ўзбекистон ва Қозоғистон махсус операция кучлари бўлинмалари ҳамкорлигидаги машғулотнинг биринчи босқичида кўзланган мақсадга эришилди. Ўқув машғулотнинг иккинчи босқичи Ўзбекистон Марказий ҳарбий округидаги «Фориш» тоғ дала ўқув маркази базасида ўтказилиши режалаштирилган.
Ўзбекистон мудофаа вазири генерал-майор Абдусалом Азизов Қозоғистон мудофаа вазирига илиқ қабул учун миннатдорчилик билдирди ва ҳамкорликдаги машғулотларни мунтазам ташкиллаштириб туриш икки мамлакат армиясининг ривожида аҳамиятли бўлишини таъкидлади.
Изоҳ (0)