Parijda Bastiliya qal’asi olingan kun sharafiga uyushtirilgan parad vaqtida ikki politsiya mototsikli o‘zaro to‘qnashib ketdi. Bu haqda “RIA Novosti” xabar bermoqda.
Voqea Fransiya prezidenti Emmanuel Makron va bayram tadbirining boshqa mehmonlari ko‘z o‘ngida sodir bo‘ldi. Totuvlik maydoni bo‘ylab harakatlanayotgan mototsiklchilar boshqaruvni eplay olmay, o‘zaro to‘qnashib ketgan. To‘qnashuvdan so‘ng politsiyachilar mustaqil ravishda o‘rinlaridan turib, tomoshabinlarning qarsaklari ostida yana parad safiga qayta qo‘shildi.
Fransiya politsiyasi va Milliy jandarmeriya yuz bergan ushbu voqea yuzasidan biror izoh berganicha yo‘q. Aftidan, avariya mototsiklchilardan biri burilish burchagini noto‘g‘ri hisobga olgani oqibatida yuz bergan.
Fransiyada har yili 14-iyulda Bastiliya qal’asi olingan kun bayram qilinadi. 1789-yilning shu kunida Bastiliya qal’a-qamoqxonasi egallangan bo‘lib, bu Buyuk fransuz inqilobining ibtidosi hisoblanadi.
Izoh (0)