Парижда Бастилия қалъаси олинган кун шарафига уюштирилган парад вақтида икки полиция мотоцикли ўзаро тўқнашиб кетди. Бу ҳақда «РИА Новости» хабар бермоқда.
Воқеа Франция президенти Эммануэль Макрон ва байрам тадбирининг бошқа меҳмонлари кўз ўнгида содир бўлди. Тотувлик майдони бўйлаб ҳаракатланаётган мотоциклчилар бошқарувни эплай олмай, ўзаро тўқнашиб кетган. Тўқнашувдан сўнг полициячилар мустақил равишда ўринларидан туриб, томошабинларнинг қарсаклари остида яна парад сафига қайта қўшилди.
Франция полицияси ва Миллий жандармерия юз берган ушбу воқеа юзасидан бирор изоҳ берганича йўқ. Афтидан, авария мотоциклчилардан бири бурилиш бурчагини нотўғри ҳисобга олгани оқибатида юз берган.
Францияда ҳар йили 14 июлда Бастилия қалъаси олинган кун байрам қилинади. 1789 йилнинг шу кунида Бастилия қалъа-қамоқхонаси эгалланган бўлиб, бу Буюк француз инқилобининг ибтидоси ҳисобланади.
Изоҳ (0)