“O‘zi nima gap?” videoblogida Aziza Qurbonova bu gal O‘zbekistondagi yangi pensiya konsepsiyasi haqida fikr yuritgan. Muallifga ko‘ra, ular orasida kishini xursand qiladigan takliflar ham bor.
Yaqinda Moliya vazirligi huzuridagi Budjetdan tashqari Pensiya jamg‘armasi pensiya bo‘yicha yangi konsepsiyani muhokamaga qo‘ydi. Saytlar “pensiya yoshi oshmoqda” degan xabarlar bilan O‘zNetni to‘ldirib tashladi. Eslatib o‘tamiz, bu hali loyiha. Hali hech nima tasdiqlanmagan, muhokama davom etmoqda.
Davlat ortiqcha xarajatdan qochib, pensiya yoshini ko‘tarib qo‘ymoqchi-da, degan fikrlarni moliyachilar rad etdi. Agar yangi konsepsiya qabul qilinadigan bo‘lsa, dastlabki hisob-kitobga ko‘ra, salkam ikki trillion so‘m miqdorda davlat uchun sarf-xarajatlar ko‘payadi. Chunki konsepsiya loyihasida nafaqat pensiya yoshi kabi bahstalab taklif, balki odamlarni xursand qiladigan bir necha yangiliklar loyihasi bor.
1-taklif: Pensiya va nafaqalarning kam miqdorlarini bosqichma-bosqich ishlab chiqilayetgan iste’mol savatchasiga tenglashtiriladi.
2-taklif: 2019-yildan boshlab barcha ishlovchi pensionerlar ham oylik, ham pensiyalarini to‘liq olishlari mumkin.
3-taklif: Qariyalar va nogironlar uyida yashayotgan yolg‘iz keksalarga to‘lanadigan pensiya miqdori oshiriladi.
4-taklif: 3-guruh nogironlariga ham nafaqa joriy etiladi.
5-taklif: Pensiya yoshi oshgudek bo‘lsa ham, erkaklar va ayollarga to‘liq pensiya staji uchun talab etiladigan 25 va 20 yil o‘zgarishsiz qoladi.Erkaklar 35 yildan, ayollar 30 yildan ko‘proq stajga ega pensionerlarning har yiliga pensiya tayanch miqdoriga ko‘ra hisoblab chiqilgan o‘rtacha ish haqining 2 % i miqdorida oshirilgan pensiya to‘lanadi.
6-taklif: Bunisi juda qiziq.Tasavvur qiling, ayol kishi 18 yil ishladi. To‘liq pensiya olishi uchun unga atigi 2 yil staj yetmadi. Konsepsiya loyihasida ayol o‘zi uchun yetmagan ish stajini sotib olishi mumkinligini aytishmoqda. Har oy uchun belgilangan to‘lov eng kam ish haqidan oshmasligi va’da qilinmoqda.
7-taklif: Yana tasavvur qiling, ikkovi bir xil stajga ega bo‘lgan ikki odam. Kimdir yillar davomida ko‘p oylik oladi va ko‘p pensiya badali to‘lab ishlaydi. Kimdir esa kamroq. Lekin pensiya tayinlanganda farq deyarli sezilmaydi. Va ko‘pchilik bundan norozi. Bunga yechim sifatida pensiyaning tayanch miqdori eng kam ish haqining 12 barobarigacha ko‘tarilmoqda.
8-taklif. Endi ishlovchi er yoki xotin o‘z oyligidan ishlamaydigan turmush o‘rtog‘i uchun sug‘urta badali to‘lab, unga ham to‘liq pensiya olish imkoniyatini yaratishi mumkin.
Tan olib aytsak, konsepsiya loyihasining shunga o‘xshash ijobiy taraflari ko‘p. Pensiya yoshi oshishiga qarshilar ko‘p, to‘g‘ri, lekin oshsa ham normal pensiya tayinlansa, mayliydi, deyotganlar ham bor. O‘qituvchi va shifokorlarimizning aksariyati pensiyayoshini ko‘tarilishini xohlamaydi, lekin pensiya yoshida ishlayotganlarning 45 foizi ham aynan ular.
Pfru.uz saytida muhokama davom etmoqda.
Izoh (0)