Jahon banki va Xalqaro moliya korporatsiyasining “Biznes yuritish” yillik hisobotida O‘zbekiston reytingini yanada yaxshilash chora-tadbirlari to‘g‘risidagi Prezident qarori qabul qilindi.
Hujjatda qayd etilishicha, so‘nggi 5 yil davomida Jahon banki va Xalqaro moliya korporatsiyasining “Biznes yuritish” yillik hisobotida O‘zbekistonning reytingi 2 baravardan ortiq yaxshilanib, mamlakat jahonning 190 ta mamlakati orasida 2012-yildagi 166-o‘rindan 2017-yilda 74-o‘ringa ko‘tarildi. Bundan tashqari, so‘nggi hisobotda mamlakat biznes yuritish uchun eng qulay ishbilarmonlik muhitini yaratish ko‘rsatkichi bo‘yicha islohotchi mamlakatlarning birinchi o‘ntaligidan joy oldi.
Shu bilan birga, O‘zbekistondagi biznes yuritish uchun mavjud shart-sharoitlar xalqaro normalar va standartlar talablariga hanuzgacha to‘liq javob bermaydi. Ayrim davlat organlari tadbirkorlik faoliyatini rivojlantirish borasida e’lon qilingan islohotlarning amaldagi ijrosini yetarli darajada ta’minlamayapti.
Vazirliklar, idoralar va tashkilotlar faoliyatining aniq muvofiqlashtirib borilmasligi, shuningdek, ular rahbarlari javobgarligining past darajadaligi sababli ayrim sohalarda biznes yuritish sharoitlarini yaxshilash bo‘yicha belgilangan chora-tadbirlarni amaliyotda ro‘yobga chiqarish ustuvor vazifalar va islohotlarning o‘zaro bog‘liq yo‘nalishlarini e’tiborga olmasdan amalga oshirilmoqda hamda barcha hollarda ham kutilgan samarani bermayapti.
Shu bois, ushbu qaror bilan investitsiya muhitini yaxshilash sohasida olib borilayotgan islohotlarning strategik maqsadi — tadbirkorlik faoliyatini amalga oshirish va chet el investitsiyalarini jalb qilish uchun mamlakatda 2022-yilgacha Jahon banki va Xalqaro moliya korporatsiyasining “Biznes yuritish” hisobotidagi jahon mamlakatlarining birinchi yigirmataligi darajasiga mos keladigan eng qulay shart-sharoitlarni yaratish ekanligi belgilandi.
Prezident huzuridagi Loyiha boshqaruvi milliy agentligi “Biznes yuritish” hisobotida O‘zbekiston reytingini yanada oshirish sohasidagi ishlarni muvofiqlashtirish hamda bu yo‘nalishda Jahon banki va Xalqaro moliya korporatsiyasi bilan o‘zaro hamkorlik qilish bo‘yicha vakolatli organ hisoblanadi.
Agentlikka:
Jahon banki guruhi ekspertlari va “Biznes yuritish” jamoasi bilan O‘zbekistonning o‘rnini asoslash bo‘yicha muzokaralar o‘tkazish uchun har yili idoralararo ishchi guruhni Vashingtonga yuborishni;
Manfaatdor vazirlik va idoralar bilan birgalikda uch oy muddatda eng muhim xalqaro reytinglarni va tarkibiy indikatorlarni, ularni shakllantirish metodologiyasini, shuningdek, O‘zbekistonning xalqaro reyting va indekslarda oxirgi ikki yilda egallab turgan mavqeini chuqur o‘rganishni;
Vazirlar Mahkamasi bilan birgalikda 2019-yil 1-yanvarga qadar muddatda tegishli xalqaro reytinglarda O‘zbekiston mavqeini yaxshilash bo‘yicha aniq takliflar tayyorlashni ta’minlash topshirildi.
Izoh (0)