«Ўзи нима гап?» видеоблогида Азиза Қурбонова бу гал Ўзбекистондаги янги пенсия концепцияси ҳақида фикр юритган. Муаллифга кўра, улар орасида кишини хурсанд қиладиган таклифлар ҳам бор.
Яқинда Молия вазирлиги ҳузуридаги Бюджетдан ташқари Пенсия жамғармаси пенсия бўйича янги концепцияни муҳокамага қўйди. Сайтлар «пенсия ёши ошмоқда» деган хабарлар билан ЎзНетни тўлдириб ташлади. Эслатиб ўтамиз, бу ҳали лойиҳа. Ҳали ҳеч нима тасдиқланмаган, муҳокама давом этмоқда.
Давлат ортиқча харажатдан қочиб, пенсия ёшини кўтариб қўймоқчи-да, деган фикрларни молиячилар рад этди. Агар янги концепция қабул қилинадиган бўлса, дастлабки ҳисоб-китобга кўра, салкам икки триллион сўм миқдорда давлат учун сарф-харажатлар кўпаяди. Чунки концепция лойиҳасида нафақат пенсия ёши каби баҳсталаб таклиф, балки одамларни хурсанд қиладиган бир неча янгиликлар лойиҳаси бор.
1-таклиф: Пенсия ва нафақаларнинг кам миқдорларини босқичма-босқич ишлаб чиқилаетган истеъмол саватчасига тенглаштирилади.
2-таклиф: 2019 йилдан бошлаб барча ишловчи пенсионерлар ҳам ойлик, ҳам пенсияларини тўлиқ олишлари мумкин.
3-таклиф: Қариялар ва ногиронлар уйида яшаётган ёлғиз кексаларга тўланадиган пенсия миқдори оширилади.
4-таклиф: 3-гуруҳ ногиронларига ҳам нафақа жорий этилади.
5-таклиф: Пенсия ёши ошгудек бўлса ҳам, эркаклар ва аёлларга тўлиқ пенсия стажи учун талаб этиладиган 25 ва 20 йил ўзгаришсиз қолади.Эркаклар 35 йилдан, аёллар 30 йилдан кўпроқ стажга эга пенсионерларнинг ҳар йилига пенсия таянч миқдорига кўра ҳисоблаб чиқилган ўртача иш ҳақининг 2 % и миқдорида оширилган пенсия тўланади.
6-таклиф: Буниси жуда қизиқ.Тасаввур қилинг, аёл киши 18 йил ишлади. Тўлиқ пенсия олиши учун унга атиги 2 йил стаж етмади. Концепция лойиҳасида аёл ўзи учун етмаган иш стажини сотиб олиши мумкинлигини айтишмоқда. Ҳар ой учун белгиланган тўлов энг кам иш ҳақидан ошмаслиги ваъда қилинмоқда.
7-таклиф: Яна тасаввур қилинг, иккови бир хил стажга эга бўлган икки одам. Кимдир йиллар давомида кўп ойлик олади ва кўп пенсия бадали тўлаб ишлайди. Кимдир эса камроқ. Лекин пенсия тайинланганда фарқ деярли сезилмайди. Ва кўпчилик бундан норози. Бунга ечим сифатида пенсиянинг таянч миқдори энг кам иш ҳақининг 12 баробаригача кўтарилмоқда.
8-таклиф. Энди ишловчи эр ёки хотин ўз ойлигидан ишламайдиган турмуш ўртоғи учун суғурта бадали тўлаб, унга ҳам тўлиқ пенсия олиш имкониятини яратиши мумкин.
Тан олиб айтсак, концепция лойиҳасининг шунга ўхшаш ижобий тарафлари кўп. Пенсия ёши ошишига қаршилар кўп, тўғри, лекин ошса ҳам нормал пенсия тайинланса, майлийди, деётганлар ҳам бор. Ўқитувчи ва шифокорларимизнинг аксарияти пенсияёшини кўтарилишини хоҳламайди, лекин пенсия ёшида ишлаётганларнинг 45 фоизи ҳам айнан улар.
Pfru.uz сайтида муҳокама давом этмоқда.
Изоҳ (0)