Innovatsion rivojlanish vaziri Ibrohim Abdurahmonov Islom taraqqiyot banki prezidentining Fan, texnologiya va innovatsiyalar bo‘yicha maslahatchisi professor Hayat Sulaymon Sindi bilan uchrashdi. Bu haqda “Daryo”ga vazirlik matbuot xizmati ma’lum qildi.
Hozirgi kunda Islom taraqqiyot bankiga 57 ta davlat a’zo bo‘lib, tashkilot ularning rivojlanishiga ko‘mak berib kelmoqda. Bank tomonidan taqdim etiladigan moliyaviy mablag‘lar Yer kurrasining qariyb beshdan bir qismiga yetib boradi. Moliyaviy ko‘mak samarasini kuchaytirish maqsadida bank turli sohalarga o‘z e’tiborini qaratib kelmoqda, jumladan, innovatsion g‘oyalarni ishlab chiqarishga tatbiq etish ham alohida diqqat markazda bo‘lgan yo‘nalishlardan.
Islom taraqqiyot banki Engage deb nomlangan innovatsiyalar bilan bozor imkoniyatlari va moliya resurslarini muvofiqlashtirish bo‘yicha onlayn-platformani ishga tushirgan. Shu bilan bir qatorda novatorlar, “start-ap“chilar, korporatsiyalarga barqaror ravishda moliyaviy mablag‘larni yo‘naltirish maqsadida maxsus Transform jamg‘armasi tashkil etilgan. 500 million dollarga ega jamg‘arma jahon rivojlanishi global muammolarining innovatsion yechimlarini topishga qaratilgan.
Professor Hayat Sulaymon Sindining Innovatsiya vazirligiga tashrifi chog‘ida a’zo davlatlarning qishloq xo‘jaligi bo‘yicha hamkorlikdagi harakati konsepsiyasini ishlab chiqishda ITB imkoniyatlaridan foydalanish haqida muzokara olib borildi. Shuningdek, yuqori ishlab chiqarish quvvatiga ega oltita kompyuter markazlaridan birini O‘zbekistonga joylashtirish bo‘yicha loyihani amalga oshirish doirasida ITB bilan hamkorlik o‘rnatish va shu markaz bazasida Yosh olimlarning xalqaro islom markazini yaratish masalasi qo‘yildi. Bundan tashqari, yosh matematiklar xalqaro olimpiadasi tashkil etish uchun moliyaviy-texnik va konsultativ ko‘mak kerakligi ta’kidlandi. Muqobil energiya manbalaridan foydalanish sohasidagi ham tajriba-innovatsion, ilmiy-tadqiqot ishlari bo‘yicha loyihalarni amalga oshirish lozimligiga ham to‘xtab o‘tildi.
Qayd etish joizki, Islom taraqqiyot bankining maslahatchisi ham, Innovatsion rivojlanish vaziri ham aslida biolog-olimlar. Professor Hayat Sulaymon Sindi allergiya bo‘yicha tadqiqotlar olib borgan bo‘lsa, Ibrohim Abdurahmonov o‘simliklar genetikasi sohasida gen-nokaut texnologiyasini ixtiro qilgan. Ilm-fan va iqtisodiyotining turli sohalariga innovatsiyalar kirib kelishiga mas’ul ikki olimning suhbati do‘stona va samimiy ruhda o‘tdi. Sindi xonim Innovatsiya vazirligi tomonidan taklif qilinadigan loyihalarni ko‘rib chiqib, ularning muhimligiga qarab ITB tomonidan kreditlar, zayomlar, grant yoki boshqa maxsus mablag‘lar ajratilishi mumkinligini aytdi.
Ma’lumot o‘rnida, Hayat bint Sulaymon Hasan Sindi saudiyalik shifokor, Saudiya Arabistoni qirolligi maslahat kengashining ilk ayol-a’zolaridan. Arabian Business jurnali dunyodagi eng nufuzli arablar ro‘yxatiga kiritgan, ayollar ichida esa u 9-o‘rinni egallagan.
Izoh (0)