Инновацион ривожланиш вазири Иброҳим Абдураҳмонов Ислом тараққиёт банки президентининг Фан, технология ва инновациялар бўйича маслаҳатчиси профессор Ҳаят Сулаймон Синди билан учрашди. Бу ҳақда «Дарё»га вазирлик матбуот хизмати маълум қилди.
Ҳозирги кунда Ислом тараққиёт банкига 57 та давлат аъзо бўлиб, ташкилот уларнинг ривожланишига кўмак бериб келмоқда. Банк томонидан тақдим этиладиган молиявий маблағлар Ер куррасининг қарийб бешдан бир қисмига етиб боради. Молиявий кўмак самарасини кучайтириш мақсадида банк турли соҳаларга ўз эътиборини қаратиб келмоқда, жумладан, инновацион ғояларни ишлаб чиқаришга татбиқ этиш ҳам алоҳида диққат марказда бўлган йўналишлардан.
Ислом тараққиёт банки Энгаге деб номланган инновациялар билан бозор имкониятлари ва молия ресурсларини мувофиқлаштириш бўйича онлайн-платформани ишга туширган. Шу билан бир қаторда новаторлар, «старт-ап«чилар, корпорацияларга барқарор равишда молиявий маблағларни йўналтириш мақсадида махсус Трансформ жамғармаси ташкил этилган. 500 миллион долларга эга жамғарма жаҳон ривожланиши глобал муаммоларининг инновацион ечимларини топишга қаратилган.
Профессор Ҳаят Сулаймон Синдининг Инновация вазирлигига ташрифи чоғида аъзо давлатларнинг қишлоқ хўжалиги бўйича ҳамкорликдаги ҳаракати концепциясини ишлаб чиқишда ITБ имкониятларидан фойдаланиш ҳақида музокара олиб борилди. Шунингдек, юқори ишлаб чиқариш қувватига эга олтита компьютер марказларидан бирини Ўзбекистонга жойлаштириш бўйича лойиҳани амалга ошириш доирасида ITБ билан ҳамкорлик ўрнатиш ва шу марказ базасида Ёш олимларнинг халқаро ислом марказини яратиш масаласи қўйилди. Бундан ташқари, ёш математиклар халқаро олимпиадаси ташкил этиш учун молиявий-техник ва консултатив кўмак кераклиги таъкидланди. Муқобил энергия манбаларидан фойдаланиш соҳасидаги ҳам тажриба-инновацион, илмий-тадқиқот ишлари бўйича лойиҳаларни амалга ошириш лозимлигига ҳам тўхтаб ўтилди.
Қайд этиш жоизки, Ислом тараққиёт банкининг маслаҳатчиси ҳам, Инновацион ривожланиш вазири ҳам аслида биолог-олимлар. Профессор Ҳаят Сулаймон Синди аллергия бўйича тадқиқотлар олиб борган бўлса, Иброҳим Абдураҳмонов ўсимликлар генетикаси соҳасида ген-нокаут технологиясини ихтиро қилган. Илм-фан ва иқтисодиётининг турли соҳаларига инновациялар кириб келишига масъул икки олимнинг суҳбати дўстона ва самимий руҳда ўтди. Синди хоним Инновация вазирлиги томонидан таклиф қилинадиган лойиҳаларни кўриб чиқиб, уларнинг муҳимлигига қараб ITБ томонидан кредитлар, заёмлар, грант ёки бошқа махсус маблағлар ажратилиши мумкинлигини айтди.
Маълумот ўрнида, Ҳаят бинт Сулаймон Ҳасан Синди саудиялик шифокор, Саудия Арабистони қироллиги маслаҳат кенгашининг илк аёл-аъзоларидан. Arabian Business журнали дунёдаги энг нуфузли араблар рўйхатига киритган, аёллар ичида эса у 9-ўринни эгаллаган.
Изоҳ (0)