Janubiy Afrika Respublikasi janubidagi Kenton-on-Si shahri yaqinida joylashgan Sibuya qo‘riqxonasida sherlar karkidonni shoxlari uchun ovlamoqchi bo‘lgan brakonyerlarni g‘ajib tashladi, deb yozadi “RIA Novosti”.
Qo‘riqxona xo‘jayini o‘z Facebook’ida ma’lum qilishicha, kamida uch kishidan iborat brakonyerlar guruhi qo‘riqlanuvchi tabiiy hududga kechasi kirib olgan. Ertasi kuni sayyohlarga safarida hamrohlik qilayotgan gid sherlar guruhi yonida odam qoldiqlarini va tilka-pora qilingan ryukzakni ko‘rgan, bu haqda zudlik bilan ma’muriyatga xabar bergan. Voqea joyiga politsiyachilar va brakonyerlikka qarshi kurash bo‘linmasi xodimlari yetib kelgan. U yerdan topilgan uskunalar marhumlarning karkidon shoxlari ovchilari bo‘lganiga ishora qilgan.
Hozircha nechta brakonyer o‘ldirilgani aniq emas. Sud-tibbiy ekspertiza davom etmoqda.
Izoh (0)