Isroil armiyasi HAMAS terrorchilik harakatining maxfiy ma’lumotlarni olish maqsadida harbiylarni maftun qilish rejalarini fosh qildi. Bu haqda The Jerusalem Post xabar berdi.
Jinoiy tarmoqni ochish bo‘yicha operatsiya “Yuraklarni sindiruvchilar” deb nomlangan va joriy yilning mart oyida boshlangan. Buzg‘unchilar hech qanday muhim ma’lumotni olishga muvaffaq bo‘lmagan, biroq milliy xavfsizlikka jiddiy tahdid yuzaga kelgan.
HAMAS a’zolari ijtimoiy tarmoqlarda soxta akkauntlar ochgan, terrorchilar oddiy fuqarolar niqobi ostida harbiylar bilan tanishgan va ulardan Google Play’dagi tanishuvlar dasturlarini telefonga o‘rnatishni so‘ragan. Qurbonlar dasturni yuklab olgach, qurilmaga virus tushgan va uning yordamida terrorchilar telefondagi turli ma’lumotlarga kirish imkoniga ega bo‘lgan.
Xabar berilishicha, Google shubhali dasturlarni Google Play’dan o‘chirib tashlagunga qadar ular taxminan 500 marta yuklab olingan.
Armiya tomonidan qayd etilishicha, erkak va ayollarni maftun qilishga birdek urinilgan. Bunda qizlar yangi tanishilgan noma’lum kishilar bilan aloqani erkak harbiylarga qaraganda tezroq uzgan.
Harbiylar ijtimoiy tarmoqlarda noma’lum kishilardan do‘stlik taklifini qabul qilmaslikka, har qanday shubhali subyektlar haqida xabar berishga va noma’lum dasturlarni yuklab olmaslikka chaqirilgan.
Izoh (0)